Di Aruba, Curacao, Sint Maarten y Islanan BES:
ORANJESTAD (AAN) – E vocero di Guardacosta, Shalick Clement, ta di bishita na Aruba unda e hibando combersacion cu su coleganan di Warda Costa.
El a expresa, na prome lugar, cu semper cu e bin Aruba e ta pasa hopi bon, y ta wordo bon ricibi y bon trata pa su coleganan di Guardacosta.
Trabao duro tin di mes, y nan ta reuni hopi y delibera, y mesora cu sra. Clement ta na Aruba, e ta probecha pa papia cu diferente media cu ta duna atencion na Guardacosta.
E biaha aki a haci esey tambe den cuadro di e estudio cu ta e “Basis Opleiding Kustwacht” pa cual tambe nan ta reclutando hobennan.
Desde Dialuna cu e dama a yega Aruba e ta haciendo bishita na diferente media, y esey a pone cu hopi hoben a reacciona. El a haya un yamada di e departamento di personal di Guardacosta bisando cu hopi hoben a acerca e organizacion pa por solicita pa e funcionnan di agente di Guardacosta.
El a duna di conoce cu e opleiding ta dura un aña. E lo cuminza na Augustus 2022, y ta bay te Juni 2023.
E curso tin diferente fase: e ta cuminza cu parti di training fisico y di challenge door di instructornan. E proceso ta cu nan ta siña crece hunto den un team, pasobra nan unidadnan ta traha hunto como team, ora presenta accion riba lama.
Banda di esey, nan ta haci e lesnan cu ta bira e aspecto mental cu nan tin cu concentra. Pesey, nan ta pidi tambe Idioma Hulandes como base, pasobra lesnan manera wet, leynan, etc., di Guardacosta ta na Hulandes.
E rekisitonan pa e hobennan por aplica ta edad di 18 pa 25 aña, tanto mucha muher como mucha homber cu kier bira agente di Guardacosta. Semper nan ta pidi mucha muher a presenta pa e organizacion por mira e balansa bunita den dje, banda di esey mester tin diploma di landamento, diplomanan di Scol ta MAVO, MBO, of un VSBO-LTS of diplomanan ekivalente.
Lamentablemente, Clement ta splica, e hoben no por bisti bril y e motibo di esaki ta cu den anochi hopi biaha tin accion y den coremento e bril of lens por kita cay, y ta bira un problema pa e hoben mes y pa su team, pasobra su e persona su bista ta asina malo cu e mester depende di e bril y na e momento ey e ta perde, e ta hinca su mes y henter su team den un problema.
Tocante e organizacion mes di Guardacosta, Shalick Clement a splica cu esaki ta basta compleho, y e mes despues di tempo y di lesa hopi, a bin compronde esaki.
E Hoofdkantoor y Kustwacht ta na Curacao, y eynan tin e parti di staf, cu ta e parti huridico. E huristanan y sra. Clement como vocero ta sinta eynan, y tin e Departamento di Finanzas cu ta coordina tur e pagonan y nan tin tambe un punto di sosten. Guardacosta ta consisti di e edificio unda e parti di staf ta sinta y e gerencia, y banda di esey tin e punto di sosten cu ta unda nan ta eherce e trabao riba e botonan mes. Pues, na Curacao tin un punto di sosten cu ta bay riba lama; otro na Savaneta, na Aruba y un na Sint Maarten.
Kiermen tin en total tres punto di sosten maritimo. Na Curacao tin Hato tambe, cu ta e punto di sosten cu ta coordina tur e trabaonan aereo unda tin e helicopternan y e avion.
Clement a splica cu Guardacosta ta reclutando hobennan di Aruba, Curacao, Sint Maarten, y Islanan Bes cu tambe ta cay bao di nan, y e opleiding lo tuma lugar na Curacao.
