Zr.Ms.Holland a yega area di Caribe y a wordo saluda cu 21 tiro di cañon na Aruba

ORANJESTAD(AAN): Dialuna mainta riba e beach dilanti di Cas di Gobernador a tuma lugar un acto ceremonial pa loke ta yegada di e barco di Marina Hulandes Zr.Ms.Holland ,

cu manera ta e custumber a manda un prome saludo di arma cu 21 tiro, cu a wordo contesta despues pa e militarnan na canto cu 21 tiro di cañon.

Capitan Bart de Wit despues di e ceremonia a papia cu prensa y a splica cu e Zr.Ms.Holland ta un asina yama ‘Ocean Patrol Vessel’ cu ta capacita pa ehecuta tareanan di Kustwacht den area di Caribe, cu tin un tripulacion di alrededor di 80 persona.

“E barco ta ocupa su mes cu sosten di e islanan di Reino den Caribe pa loke ta intercepcion di cargamentonan di droga, pero tambe combatimento di trafico humano”, segun de Wit.

El a sigui bisa cu e barco tin un cantidad di sistema di arma cu ta inclui un cañon dilanti, mientras cu na banda tin e asina yama ‘marlins’, pa por defende su mes contra boto of barconan cu ta yega cerca.

“Esaki no ta un barco di atake, sino e ta un barco cu mester por defende su mes”.

Barconan manera Zr.Ms.Holland ta bishita area di Caribe 1 baha den cada 4 luna, despues di cual otro barco ta tuma nan lugar for di Hulanda, segun e Capitan.