E di cuater ola di e variante Delta ta esun cu a costa mas bida na Aruba

Premier Wever-Croes: *Aunke situacion ta bao control ta preparando pa factornan nobo

ORANJESTAD (AAN):   Manera DIARIO a anuncia dialuna, Gobierno di Aruba hunto cu Crisis Team a anuncia den un conferencia di prensa algun cambio cu lo bin den e maneho pa loke ta Covid-19.

Prome Minister Evelyn Wever-Croes a referi na prome lugar na e cifranan di Covid-19 cerando luna di November unda a constata cu e luna aki tabata un luna unda tabata tin e pandemia bastante bao control aki na Aruba.

E mandatario a agrega cu a cuminsa e luna di november cu 173 caso activo y te cu dialuna, e casonan activo raporta tabata 175. E casonan a fluctua durante di e luna, pero ta bay ta cerando na casi e mesun nivel cu a cuminsa.

Tambe a mira cu e cantidad di personanan den cuido intensivo ta den e cantidad cu por maneha. Esaki ta e dos criterianan cu ta uza pa conclui cu aworaki tin ainda e situacion bao control, a enfatisa.

Wever-Croes a sigui bisa cu Aruba a pasa den 4 ola, desde cu e pandemia a inicia na Maart 2020. E prome ola tabata despues di 13 di Maart 2020 ora cu e prome casonan a wordo detecta. Esaki tabata un ola relativamente chikito y el a dura cortico te na April.

Despues a keda basta dia sin niun caso. E prome ola a yega na un piek di 69 caso activo.

E di dos ola tabata di Augustus 2020 te cu November 2020 y esaki tabata e ola cu unda e piek a yega te na 1630 caso activo. Den e di dos ola aki a perde 42 bida aki na Aruba.

E di tres ola a cuminsa na December 2020 y a bay te na Maart 2021. El a piek banda di Maart cu 624 caso activo y a baha bek. El a piek atrobe te na 704 caso activo y a yega te na Juni 2021. Esaki tabata un combinacion di dos ola chikito reparti riba un periodo mas largo  cu a dura basta tempo pa por a combati'e. Den esaki, 62 persona a perde nan bida.

Premier Wever-Croes a indica cu e di 4 ola a inicia na Juli 2021 y ta extende te na November 2021 unda e piek a marca 1076 caso activo. Esaki ta e ola di e variante Delta y ta esun cu a costa mas bida te cu aworaki. 67 persona a fayece den e periodo aki

E ola aki tambe tin bao control y ta preparando pa algun factor cu ta di preocupacion manera ta e aparicion di e variante 'Omicron' cu a surgi siman pasa na Sudafrica y cu ta wordo califica como uno peligroso pa mundo henter.