Turista sin e defensa di un mask ta uni cu publico cu kier baila --- *Delta ainda ta presente den Cuido Intensivo na Aruba y Colombia --- *Libertad personal di awe por habri porta pa un lockdown nacional
ORANJESTAD (AAN) — Ningun hende por confirma si un virus mester haci su entrada den un comunidad, te na momento cu casonan cuminsa presenta nan mes y e virus anuncia asina su presencia.
Aruba ta un pais di turismo. Esaki ta nifica, cu Aruba ta un pais, caminda continuamente biaheronan di tur parti di mundo presenta.
Ta facil pa dicidi e ultimo parti di procedencia di un turista. Ta facil bisa cu e no tabata na e paisnan cu te awor ta wordo considera pais caminda e virus ta presente.
Varios pais ainda no ta na haltura cu nan tin e variante den nan comunidad pasobra ainda e presencia no ta conoci dor di casonan confirma.
Ta parce cu comunidad kier scrap un advertencia serio cu for di inicio di 2020 Covid-19 a entrega.
Ora 2020 a habri, ya Covid-19 tabata presente. Ora e prome informacionnan a cuminsa drenta na tur pais, ainda hende no kier a acepta e peliger.
Hopi pais a baila den Carnaval y a sigui expone nan mes na peliger, te na momento cu mester a cera porta di paisnan y tur hende mester a busca refugio di nan cas, pa asina evita cu morto lo a drenta.
DIARIO no ta bati alarma falso. Pa basta dia nos ta adverti loke ta pasa na mundo, cu awe no sa cual ta e rumbo cu ta spera pa futuro.
No por mira solamente dianan di fiesta cu hende a pone riba calender, pero mester mira e realidad cu lamentablemente Aruba tambe conoce.
Cu un cantidad di ciudadano cu ta nenga vacuna y asina ta keda un peliger pa henter poblacion, Aruba ta drenta un epoca cu por destrui henter economia atrobe y por pone comunidad na careda.
Te awor no ta conoci kico exactamente ta diferente entre Delta y Omicron. Loke si ta un hecho ta, cu tanto Delta como Omicron, ta mata.
Cada dia cu pasa, mas y mas mundo ta cera conoci cu e berdad destructivo enorme di e Coronavirus-nobo, cu no solamente ta afecta e grupo di edad mas halto den comunidad.
Awe babynan cu ainda mester a nace, no ta nace pasobra nan mama a wordo contagia y e malesa a afecta organonan importante.
Delta a yega hospitalnan rond mundo cu mucha inocente, di cual un grupo tambe no a haya oportunidad pa crece pero otro grupo a recupera sin tin seguridad di loke e enfermedad por ta den nan futuro.
Hende solamente ta na haltura di loke paso a paso e Coronavirus nobo ta permiti hende di comprende.
Si hende ta stima nan mes y ta stima otro, nan ta cuminsa na preveni morto di otro y di nan mes.
Si nan no tin miedo ni di morto pero kier sigui baila, mester splica nan cu cualkier momento, tur oportunidad pa baila tambe ta wordo tranca.
E mundo di comfort cu hende a conoce, ta tras di lomba den un economia mundial, cu no por produci loke ta basico.
Cientificonan y expertonan mundial ta papia di un catastrofe economico cu ta spera mundo, si no logra domina e situacion mundial den cual Delta ta topa cu Omicron.
Kico ta libertad? Algo cu no tin placa pa cumpra pasobra placa a caba. Loke tin dilanti ta mas destruccion di hende y tur loke ta placentero pa hende si no dicidi awor cu ta enfrenta e malesa cruel, cu ta menasa futuro.
Kico ta haci ora no por comunica riba computer mas? Kico ta haci ora, manera na Hulanda, no tin suficiente trahador pa traha mas y empresanan por tranca?
Entre Delta y Omicron tin un gran berdad. Hende ta miedo di enfrenta su mes cu e berdad di Covid-19.
Hende cobarde no kier un solucion pa un manesa cruel y destructivo, cu ta cambia di nomber pero no di naturalesa mortal.
Na Aruba actualmente tin hende ainda den Intensive Care. Ainda tin Arubiano den Intensive Care na Colombia. Ainda tin hende den hospital.
Ainda tin inocentenan cu por bira victima di Delta y Omicron hasta prome cu nan nace y haya chens pa mira luz di dia.
