Zr.Ms. Groningen a stop un ‘go-fast’ cu cargamento di 300 kilo di cocaina

ORANJESTAD (AAN): E barco di Marina Hulandes Zr.Ms. Groningen riba 24 di Mei a detecta un transporte di droga.

Den Laman Caribe e barco patruyero a sa di detene un ‘go-fast’ y detecta un cargamento di 300 kilo di cocaina.

                Despues di un patruya, un avion patruyero di Wardacosta Region Caribe a detecta un ‘go-fast’ cu cuater ocupante, na e parti Nortost di Aruba. Despues di esaki Zr.Ms. Groningen a involucra e helicopter MH-65 Dolphin di Wardacosta Mericano, cu actualmente ta abordo di e barco patruyero.

                Despues cu e helicopter a encontra e contacto y a duna algun señal pa stop, e ‘go-fast’ no a stop. Pa e motibo ey a efectua tironan di advertencia, despues di cua e cuater ocupantenan a entrega nan mes. 

                Pa por a detene e ocupantenan dos boto di intercepcion rapido (FRISC) a keda lansa den laman.  E abordahe a keda ehecuta pa un team combina di Law Enforcement Detachement (LEDET) di Wardacosta Mericano y e propio Fleet Marine Squadron (FMS).

                E ocupantenan y e contrabanda despues di esey a keda entrega na un barco di Wardacosta Mericano pa huicio na Merca. 

                Zr.Ms. Groningen for di April 2022 ta activo atrobe den e region como barco patruyero pa Region Caribe, pa operacionnan anti droga.