Imelda Kleuterschool a devela nan logo nobo

ORANJESTAD (AAN)—Minister di Enseñanza y Deporte Endy Croes, tabata na Imelda Kleuterschool,

pa acompaña e alumnonan hunto cu nan cabesante y docentenan, den e acto di develo di e logo nobo di scol. Tabata presente tambe Anueska Baly, director di SKOA.

E mandatario a bisa e muchanan cu e nificacion di e logo, manera Juffrouw Tamara a splica, lague sirbi nan di inspiracion, y a expresa cu dia di mañan nan ta esnan cu lo bay dirigi e pais yama Aruba, y a subraya cu algun di nan kizas tin e soño di bira un deportista, otronan lo bira polis, docter, etc. E dignatario ta sigur cu door di e estimulo cu e docentenan ta duna nan, boso por haci boso soño bira realidad.

El a pidi e alumnonan pa scucha di nan juffrouwnan di scol, pa haci bon mucha cu otro, pasobra nos tur mester di otro.

Minister Endy Croes a felicita scol pa su gran trabao aki, e docentenan y tur esnan cu a traha riba e logo bunita aki. “Masha masha pabien di nos parti, y conta cu nos sosten”, e dignatario a acentua. E mandatario a finaliza cantando un parti di e himno di Imelda Kleuterschool.