Yudansa pa cubri material di scol ta bira un alivio grandi pa famia vulnerabel

ORANJESTAD (AAN): Gobierno ta subi e yudansa escolar y apoyo social: na cuminsamento di aña escolar.

Den fin di siman Minister President Mike Eman y Minister di Asuntonan Social, Cuido y Cuido di nos Grandinan Mervin Wyatt Ras a anuncia cu Conseho di Ministro di Gabinete AVP-Futuro a aproba un pakete di yudansa cu ayudo financiero pa famianan vulnerabel cu ta drenta na vigor na luna Augustus/September 2025.

   E aumento ta dirigi specíficamente pa yuda e famia cu ta riba bijstand na e cuminsamento di e aña escolar nobo.

   “E aumento aki ta un nececidad, un paso necesario den interes di nos muchanan nan futuro,” segun Minister-President Mike Eman. “Un gobierno responsabel mester yega den tur bario, y sostene famianan y nan yiunan. Si nos kier pa tur mucha tin un comienso igual den scol, nos mester kita e obstaculo financiero pa e famianan vulnerabel. Nos ta haci esey awe.” Minister President mr. Mike Eman ta accentua. Hunto cu Minister Wyatt Ras a anuncia e siguiente decisionnan.

   E yudansa aproba ta inclui: (*) E yudansa pa apertura di e aña escolar pa cumpra material pa scol ta subi di 220 Florin pa mucha na 250 Florin, cu un maximo pa henter cas di 1.000 Florin (antes e tabata 800 Florin);

  (*) E contribucion pa scol, cu ta worde paga directamente na scol, ta subi di 120 Florin pa mucha na 250 Florin.  (*) E compensacion mensual pa famia cu mucha na scol (di edad di 3 te 24 aña) ta subi di 250 Florin na 300 Florin pa luna (13 biaha pa aña).  (*) E bijstand basico pa persona ta subi di 450 Florin na 600 Florin pa luna.

   Minister Mervin Wyatt Ras a enfatisa e caracter social di e decision: “Nos ta manda un mensahe cla: nos hendenan no ta nan so. Den temponan dificil, nos ta para cu nos hendenan cu mas mester di nos. E aumento aki ta e forma di compasion pa cambia bida di nos hendenan.”

   Durante su bishita recien den bario di Jaburibari, Minister-President Eman a ricibi hopi palabra di agradecimento di banda di e residentenan di bario. Nan a mustra nan ta hopi contento cu e aumento di pensioen di Fls. 250, cu e cobertura di medicamento di remedinan cu AZV awor cu decision di Gabinete AVP-FUTURO ta worde cubri atrobe. Awor tambe e aumento den bijstand – un ayudo directo cu ta yega directamente na e famianan den e bario cu mas mester di dje ta otro paso pa tey pa pueblo, mr. Mike Eman ta enfatisa. Eman ta mustra tambe cu den tur e decisionan aki unda cu mester cambia e prioridadnan financiero den Presupuesto ta haya e cooperacion di e Gabinete completo y di e Minister di Finanzas mr. Geoffrey Wever.