Tin suficiente luga pa ehecuta e proyecto “Marina Super Yacht Harbor” na San Nicolas

Errol de Freitas, Presidente di SNBA:

*Tin parti di e construccion traha caba 

ORANJESTAD (AAN) — Errol De Freitas, Presidente di San Nicolas Business Association, den entrevista cu Matutino DIARIO a expresa cu e tin e video di e proyecto pa traha na San Nicolas un “Marina super yacht harbor” cual ta fenomenal, y e tin confianza cu e wordo ehecuta.

De Freitas ta kere cu e proyecto a cuminza pasobra e construccion cu a tuma luga caba. De Freitas a comenta cu e tin comunicacion cu dos representante di e promotornan di e proyecto aki, cu ta ubica na cabes di e parti west di Rodgers Beach.

            “Tin suficiente lugar pa nos pone un Mega Yacht Marina Harbor, cu automaticamente ta bay trece e clientela cu San Nicolas mester. Nos ta entregando na Gobierno un plan completo, y tur e terenonan di e refineria, di mas of menos seis aña di estudio, cu nos a weita tur e posibilidadnan cu e profesionalnan di e area ey, pa facilita gobierno tur e rechtingnan cu nan ta cana den dje”, de Freitas a señala.

            El a agrega cu enberdad tin cu haci e refineria limpi, pero tin asina hopi cos cu por haci riba e terenonan di e refineria anto den e plannan di e tempo ey hopi cos ta posibel. Aworaki, mester midi kico ta posibel y na unda.

            “Pero atrobe, nos tin hopi confianza cu e vision di San Nicolas cu nos a bay entrega, tin tur ingredientenan. Nos no a faya ningun parti di dje.

            E ta dividi den cuater area: Downtown San Nicolas, e aspecto di Colony, e terenonan di e refineria, y e restantenan”, Errol de Freitas a indica.

            De Freitas a menciona cu SNBA tin un relacion cu Pos Chiquito y cu Savaneta, den un samenwerking, y a expresa cu, cu su fe y di tur hende, e proyecto aki lo haya atencion di gobierno, y e ta spera esaki tambe.