Minister Geoffrey Wever
*Kier trece un balansa den biba, traha y explora den e centro di Oranjestad
ORANJESTAD (AAN): Recientemente den presencia di Minister President Mike Eman y Minister di Finansa, Asuntonan Economico y Sector Primaria Geoffrey Wever a tuma lugar e Kick-Off Session di Oranjestad Investors Group (OIG) unda cu nan a presenta e plan cu e grupo tin pa inverti den e revitalisacion di Oranjestad, combinando e encanto di pasado cu e vision di futuro. Cu e vision aki kier trece un balansa den biba, traha y explora den e centro di Oranjestad.
OIG a cuminsa como Wilhelmina Investors Group (WIG) cu tabata tin como meta pa renoba, restaura y inverti den revitalisacion di Wilhelminastraat. Cu ampliacion di e grupo, cu awo ta conta cu 12 inversionista, a dicidi pa bin cu e iniciativa pa busca un team di experto pa bin cu un plan strategico, no solamente pa revitalisa Wilhelminastraat, pero pa haci esaki pa ful e centro di Oranjestad.
E plannan aki ta cuadra cu e vision di Gabinete AVP-Futuro, cu den su Programa di Gobernacion a acorda cu lo revitalisa centro di Oranjestad cu vivienda y area pa actividad social. Minister President Mike Eman y Minister Geoffrey Wever a elabora riba e importancia pa sector priva traha hunto cu Gobierno y cu Gobierno AVP-Futuro tin e revitalisacion di Oranjestad como un dia nan prioridadnan.
“Mi ta hopi contento y satisfecho pa mira cu inversionistanan ta para banda di gobierno pa hunto nos logra e meta comun cu nos tin, cu ta pa revitalisa e centro di Oranjestad. Gobierno no por realisa tur cos su so. Inversionistanan tin un rol esencial den e desaroyo y den e caso aki e revitalisacion di Oranjestad y pronto nos lo inicia e revitalisacion di e resto di Wilhelminastraat y area di Klipstraat y Oranjestraat pa asina full e area cu embeyece” minister Geoffrey Wever a termina bisando.