Yamada pa participacion na e expedicion di bayena y dolfijn rond di islanan ABC

Pueblo por participa

ORANJESTAD (AAN): Informacion for di Curaçao ta indica cu Caribbean Cetacean Society (CCS) ta organisa pa e prome biaha e expedicion cientifico di bayena y dolfijn, asina yama ‘Ti Whale An Nou’, na Aruba, Bonaire y Curaçao.

   DIARIO a compronde cu e programa di investigacion aki ta parti den 6 mini expedicion y ta tuma luga di 10 di October pa 29 di October. CCS ta encurasha habitantenan di e ABC-islanan pa participa y siña for di e oportunidad unico aki.

    “E expedicion no ta un excursion turistico pa mira bayena y dolfijn, pero un campaña di

investigacion. E resultadonan di e expedicion lo contribui na identifica kico mester pa

proteha e animalnan menasa aki mihor contra menasanan cu nan ta enfrenta dor di

actvidadnan di hende”, Jeffrey Bernus a splica.  Bernus ta co-fundado di CCS.

   Ademas di bayena y dolfijn, CCS ta bay observa parhanan di lama (zeevogels) tambe. Actualmente tin tiki informacion accesibel di e parhanan aki den Caribe. CCS tin intencion pa comparti tur observacion cu Gobiernonan y organisacionnan di naturalesa den Caribe.

   Pa cada mini expedicion e barco lo keda riba lama pa tres dia pa por monitor bayena y dolfijn. Participantenan di e expedicion lo yuda e ekipo di CCS cu observacion di bayena, dolfijn y parhanan di lama y saca portret di e animalnan. Nan ta duna sosten pa registra informacion manera condicion di tempo y presencia di barconan. Experiencia cu e tareanan aki no ta necesario, tur hende por registra. Solamente ta rekeri un compensacion pa cuminda.

   DIARIO a ser informa, cu e registracion ta posibel te cu 21 di September via e website:

www.bit.ly/dolfijn2023

   Cada investigacion ta contribui na desaroya capacidad pa mehora e habilidad di personanan local pa por studia bayena y dolfijn. E expedicion aki ta dedica na Paul Hoetjes.  Ta conoci cu Paul Hoetjes tabatin diferente funcion den cuadro di maneho y conservacion di naturalesa den Caribe Hulandes. E tabata co-fundado di Yarari Marine Mammal and Shark Sanctuary y un di e hendenan cu tabata e inspiracion tras di Caribbean Cetacean Society. 

   Wereld Natuur Fonds ta financia ‘Ti Whale An Nou’ y esaki ta parti di un programa di tres aña. E

delaster tres aña a monitor e islanan entre Grenada y Anguilla, incluyendo e islanan Frances, Ingles y Hulandes. For di e aña aki ta inclui e islanan ABC tambe den e programa regional aki.