Gustave Nouel na Aruba como invitado especial di ATA

ORANJESTAD (AAN): DIARIO a tuma nota cu e artista Gustave Nouel ta na Aruba atrobe. 

A haya sa cu e biaha aki el a yega como invitado especial di Aruba Tourism Authority (ATA) pa actualiza su pintura di tur CEO's di ATA.  Tambe pa promove y prepara un gira internacional na 2024, cu e buki ‘Maternidad’ den 4 idioma.

   DIARIO tabata presente na Oficina di ATA, ora cu Nouel a entrega e buki, (cu tabatin apoyo di diferente artista local dinamico), na e actual directora di ATA, señora Ronella Croes, pa yuda promove e gira internacional di ‘Maternidad’.

   Despues di e start na Aruba, cu exposicion y workshops di e autornan, Zuleika Coffie y Gustave Nouel, lo ofrece e proyecto-modelo aki cu a cuminsa na Aruba, na tur parti di nos Reino.  Ademas di ATA su apoyo pa purba start na Aruba na Mei di 2024, e proyecto tambe por conta cu apoyo di Biblioteca Nacional di Aruba, Departamento di Cultura y mas actor importante, manera Universidad di Aruba y UNESCO... y naturalmente cu apoyo di nos curator Arubiano, Renwick Heronimo.

   A haya sa cu Bonaire y St. Maarten a mustra interes concreto caba pa sigui cu e proyecto ‘Maternidad’, despues di Aruba.  Ora Art Fair Aruba a tende di ATA cu Gustave Nouel lo ta na Aruba e temporada aki, di biaha nan a pidi GN trece un cuadra pa participa na Aruba Art Fair. 

   Un siman prome cu Aruba Art Fair a invita Nouel, el a completa un cuadra 'quasi abstracto', inspira pa un Fenomeno Cosmico, titula: "Wowo di Dios". Un pintura abstracto, cu ta logra Harmonía perfecto den su Caos, den wowo di GN.

   Tambe Gustave Nouel ta preparando proyecto di arte na Rancho, e parti mas historico di Oranjestad, hunto cu Zuleika Coffie y Mo Mohammed, relaciona cu celebracion di 200 aña Oranjestad na 2024.  Celebracion di 200 aña Oranjestad, tambe ta un bon oportunidad pa purba realisa e soño di crea un Museo Arubiano. Un soño cultural na Aruba, mas di 30 aña caba! Tin edificio potencial caba. Y awor tambe cu Anfiteatro y Círculo di Arte pa por apoya tur disciplinanan artistico na Aruba. Hende local cu ke yuda di cualkier manera pa logra e soño aki por tuma contacto cu Stanley Brown via email: This email address is being protected from spambots. You need JavaScript enabled to view it. y corda cu tur cos tin nan tempo.