Hende local no tin acceso mas:
ORANJESTAD (AAN) – Un comentario interesante, pero alavez decepcionante, un señora a trece dilanti via opinion publico, den sentido cu un parti di e esencia di e caracter solidario di sector di turismo pa e famianan Arubano den tempo di vacacion escolar, a bay perdi.
Di con? Pasobra den pasado casi tur hotel tabata traha paketenan special pa famianan local por a pasa un fin di siman den camber di un hotel, den algun caso incluyendo desayuno den e prijs special.
Tin famianan cu tabata goza hasta di un siman completo cu nan yiunan, pasobra algun hotel tabata ofrece prijs special pa un siman tambe, den un camber cu espacio pa dos mayor y dos yiu, y hasta e posibilidad di un cama pa baby si esey tabata rekeri.
Despues di hopi tempo cu e señora aki no por a goza di un fin di siman den un hotel local cu su dos yiu mas chikito (e dos grandinan ta na Hulanda studiando caba), el a purba y a yama puntra pa prijs na diferente hotel, y a keda sorprendi di scucha cu e paketenan pa local no tey mas, cu e aumento di turismo no ta laga espacio pa hende local paga menos, y e prijsnan ta asina halto cu e dama a desisti.
En cambio a haya un pakete cu un aerolinea pa bay Medellin, cu el a logra cu su presupuesto pa bay cu su yiunan, y a keda aya cuater dia masha agradable mes. Nan a hay un bon hotel, a come hopi dushi den diferente restaurant di cuminda crioyo, a bay parke, cinema, teatro, y algun diversion mas, incluso den e mesun hotel y placa a yega pa cumpra jeans y keds pa e muchanan.
E ta sinti su mes hopi decepciona di con Aruba enberdad a bira casi exclusivo pa turistanan y cu no tin mas un excepcion pa famianan local, durante vacacion grandi. Pa October sigur tampoco pasobra ya e sa caba cu prijs lo aumenta hopi. E ta sinti cu Aruba ta pa turista pasobra hasta den supermercadonan por ripara esaki, encuanto prijs, y el a expresa cu e no por keda cu e sentimento aki paden, y ta spera cu tin mas reaccion al respecto, pasobra con cu bay bin ta danki na e trahador Arubiano y algun residente cu ta traha den turismo, nos industria aki ta subiendo manera scuma, di cual e hende local mes no ta haya acceso mas.
