Xavier University School of Medicine cu nan edificio nobo

Na Hato - ORANJESTAD (AAN): E trabao a keda cla, y den fin di siman a tuma lugar cortamento di cinta.

   Xavier University School of Medicine na Aruba tin un campus nobo situa na Hato, den e area patras di Aruba Bank bay panort.

   E edificio nobo aki ta uno cu a worde construi specialmente pa nan studiantenan cu ta bin den exterior por biba aden.  E edificio den forma di letter L, ta di 3 piso.

   Ademas di ta suministra facilidad pa studiantenan por haya trankilidad pa studia, y pa relaha, por a nota cu e ta dispone di un pool y hardin tambe pa relaha aden.

   E edificio aki a haya e nomber Jagadeesan & Kanchana Poola Family Housing Block.

   President Ravishankar Bhooplapur a mustra cu esaki tabata un inversion di 30 miyon Dollar.

   Ademas di esey, banda di e edificio aki lo bay bin Fase 2 di e proyecto, cu ta un inversion di 40 miyon Dollar, y e lo ta un seccion Academico completo.

   Mayoria di e studiantenan di Xavier ta bin di Merca y Canada, mientras cu tin otro studiantenan tambe di 26 otro pais.