ORANJESTAD(AAN): Despues cu Formador Dialuna mainta a papia cu representante di comunidad Filipino na Aruba, Amy Henriquez-Mendez, Consul General Honorario di Filipinas na Aruba durante un conferencia di prensa a hiba palabra.
Segun Henriquez-Mendez, e reunion tabata hopi fructifero, unda cu el a expresa e preocupacion na Formador di e comunidad Filipino na Aruba.
“Nos a cuminza na papia riba e medidanan di COVID-19 y riba e hecho cu tin Filipino y Arubianonan cu no a vacuna ainda”.
Por fabor boso bay vacuna pasobra e cantidad di casonan di contagio ta aumentando.
Ta importante pa bo salba bo mes y salba nos tambe, segun e Consul General honorario.
El a indica cu el a papia cu Formador tambe riba permisonan cu ainda no ta wordo trata mes rapido cu locual a wordo spera.
“Mi sa cu señora Paskel ta haciendo tur posibel pa bosonan cu ainda no ta legal aki na Aruba”.
Cu pasenshi nos lo logra nos meta, segun Henriquez-Mendez.
El a bisa cu el a papia cu Formador tambe riba e hecho cu tin hende cu a haya permiso pero ainda no a ricibi nan paspoort Hulandes.
E Consul General honorario a pidi esnan cu falta algo den nan documentonan pa nan acerca hendenan cu sa di esaki y cu por yuda nan drecha e documentonan.
“Ora boso haya boso paspoort Hulandes boso lo ta liber y na paz kedando riba e isla aki”.
Nos tur ta Filipino, pero ban traha na beneficio di e isla aki cu a duna nos un oportunidad pa cuminza un otro bida, un mihor bida, segun Henriquez-Mendez, kende a sigui enfatiza pa tur hende tuma un vacuna.
