Xavier Geerman corona como Rey di Dera Gay 2025

ORANJESTAD (AAN)/Den Haag: Xavier Geerman a finalisa como Rey di Dera Gay na e Festival di San Juan cu

a tuma lugar en fin di siman aki na Tilburg. Xavier a ricibi e trofeo for di man di directora di Gabinete di Aruba Joselin Croes LL.M/M.Sc. Tambe tabata tin  premio pa esun cu mata e gay, ranca bandera y e baile di San Juan. 

E programa a cuminsa cu canto di nos himno Aruba Dushi Tera pa e cantante Jeremy Garcia. Directora di Gabinete di Aruba Joselin Croes a tene un discurso bisando di ta contento cu Gabinete di Aruba ta organisa e festival aki den cooperacion cu Asociacion Nos Baranca di Tilburg.

‘Gabinete di Aruba ta organisa fiestanan cultural manera San Juan, Dia di Himno y Bandera y Dande pa conserva nos herencia cultural bou di e comunidad Arubiano na Hulanda. Un comunidad cu ta diverso, mirando cu tin un generacion nobo di Arubiano cu a nace y lanta na Hulanda; no ta conoci cu e tradicionnan cultural cu ta hancra den bida y pensamento di e Arubiano bibando na Aruba. Alabes e eventonan cultural aki ta laga nos sinti nos mes na cas papiando nos dushi Papiamento y comiendo dushi cuminda crioyo.’

‘Mira asina tanto cara conoci awe ta yena mi cu alegria paso ami tambe ta leu di cas y mi ta haya hopi falta di mi famia na Aruba. Tin ora nos no ta realisa con duro heimwee ta dal nos y principalmente nos studiantenan. Dus mi ta pidi cada uno di boso cu a bin awe pa “reach out” na nos studiantenan cu ta nan so akinan leu di nan famia, invita nan pa un coffie of pa dal un wega di Domino. Uni nos ta para mas fuerte. Pesey cada bes cu Gabinete organisa un Ban Topa, Arubadag, Workshops, Dande of otro fiestanan cultural boso please bin pa asina nos por enrandece nos cultura pero tambe pa nos network cu otro y yuda e comunicado Arubiano keda den contacto cu otro,’ tabata palabranan di Joselin Croes. 

Señora Croes a para keto den su discurso na señora Mena Maduro dfm, cu semper a sa di coy e timon y organisa e festival aki pa nos Arubianonan na Tilburg. Segun Joselin Mena Maduro ta un Arubiano di puro sanger, cu ta stima su pais y nos cultura aunque cu e tabata biba leu fo'i cas y pesey el a pidi un minuut di silencio den memoria di señora Mena Maduro. 

Despues e programa a sigui y e tabata un merdia hopi ameno cu canto, baile y wega di domino. Gabinete di Aruba por mira bek riba un bunita celebracion di nos cultura aki na Hulanda. 

E potretnan ta cortesia di Gabinete di Aruba