Esaki ta nomber di tur esnan cu a logra rescata e baby Flamingo na Aruba y hibe urgente pa Bonaire

Trabao di rescate tabata exitoso

• Aerolinea y hopi boluntario a yuda transport’e pa Bonaire 

ORANJESTAD (AAN): Siman pasa, personal cu tripulantenan, y tambe personal na Aeropuerto, a haci un trabao sobrehumano pa logra yuda rescata un flamingo chikito cu kizas a “perde” door di bula asina hopi y a baha na Aruba den situacion basta critico, cu mester a wordo transporta cu urgencia pa rehab di e parhanan aki na Bonaire!  Y nan tur hunto a logra esey tambe.

   Dentro di apenas 2 ora despues cu yamadanan a cuminza drenta pidiendo cooperacion pa transporta e flamingo, ya e parha tabata abordo di un di e avionnan Twin Otter di Divi Divi Air, y tabata bulando rumbo pa Bonaire.  Tur esaki a wordo aregla den tempo record!

   Den e edicion aki awe di DIARIO, ta publica nomber di tur esnan cu a duna un man pa asina yuda e Flamingo jong aki haya un segundo chens di bida, y cu esfuerzonan sobrehumano a logra cu den apenas par di ora ya e tey den man di expertonan cu ta haci rehabilitacion di flamingo.

   Pero yudansa grandi a ser yama aki di Rangernan Marcelin y Sander y Aruba Conservation Foundation, temporalmente a haya refugio cerca veterinario Ricardo, y a ricibi yudanda pa papeleo di parti Autoridad Cientifico di CITES na Aruba.  A haya yudansa tambe di Greg Peterson di Aruba Birdlife Conservation, y Natasha di Aruba Conservation Foundation cu a core transporta e flamingo pa Aeropuerto di Aruba.

   Tambe danki na Divi Divi Air stationmanager na Aruba, esta Teresa Ribeiro y henter e crew di Genair Aruba flighthandlers.  Tambe e capitannan di Divi Divi Air, esta Tahir Martin y Hyacinth Cijnthe, cu a bula di Aruba pa Curaçao, y sigui pa Bonaire.

   Tambe ta manda bisa danki na Divi Divi Air Operations y Ground Handling na Aeropuerto di Curaçao.  Tambe ta gradici Divi Divi Air Bonaire cu nan stationmanager Alexandera Contreras kende ta ser mira riba e potret, hunto cu Divi Divi Bonaire Groundhandling.

   Nan ta contento cu Elly Alberts di Bonaire Wild Bird Rehab, a core pasa busca e flamingo net asina cu e avion a caba di ateriza.

   Henter e cadena di evento aki a logra cu e ‘Baby Flamingo’ cu a yega e isla di Aruba, a stop di bula y ricibi yudansa, y pa asina por bay di Aruba pa Bonaire, a yega na e Rehab den apenas 3 ora y mey despues di a ricibi e prome yamada.

   DIARIO tambe ta manda felicita tur esnan cu a duna un man pa haci algo bunita hunto pa salba e bida di e bunita parha aki.