Weganan Suramericano a escoge Aruba como pais revelador di e competencianan

Algo pa ta orguyoso di dje

ORANJESTAD (AAN): E di 12 Weganan Suramericano di ODESUR na Paraguay a yega su fin.  Y ta saliendo na cla awor, cu e delegacion chikito di Aruba a haci un impacto na e competencianan aki.

   Na final di e Weganan, e organizadornan a dicidi na reconoce e mihor y diferente atletanan den nan categoria. 

   Panam Sports Awards Asuncion 2022 a escoge como “Mihor Deportista Femenino” e atleta Giovanna Diamante den landamento.  E ta un atleta di Brasil, kende den landamento a gana 8 medaya di oro, y dos medaya di plata.  E atleta femenino aki asina a bira esun cu a gana mas medaya durante Weganan Suramericano.

   Panam Sports Awards Asuncion 2022 a escoge como “Mihor Deporitista Masculino” cu ta un atleta di Brasil di Gimnasia Artistico, esta Caio Souza.  El a obtene 4 medaya di oro den e competencianan aki, incluyendo den team.

   Panam Sports Awards Asuncion 2022 a escoge pa otorga “Premio pa Pais Revelacion” na e isla chikito di apenas 100 mil habitante Aruba.  Nan a indica cu e pais bunita di Caribe tabata sin duda e gran sorpresa di e Weganan ODESUR aki.  Aruba cu un delegacion chikito, a logra un registro historico di 3 medaya di oro, y 3 medaya di plata.  Seis medaya total logra den Landamento, Bowling, y Bela.

   Panam Sports Award Asuncion 2022 a otorga premio di Mihor Team Femenino, na e seleccion di Chile den Hockey.  E Premio di Mihor Team Masculino a bay pa e seleccion di Paraguay den Beach Soccer.   E Premio di Atleta Femenino cu mihor Discurso na final a bay pa Paola Ferrari di Paraguay. 

   Un palabra di pabien na e delegacion di Aruba, kendenan a demostra di por representa e isla chikito aki na un forma grandi.