ORANJESTAD (AAN): E situacion economico/financiero na Aruba ta precario. Gobierno y tur “stakeholders” ta haciendo un tremendo trabou pa recupera e economia despues di e pandemia cu a afecta Aruba y mundo henter.
Ya caba Gobierno a logra reduci e deficit di 1.028 miyon di aña 2020 te cu 25 miyon florin pa aña 2023. Nos turismo ta recuperando y den e ultimo lunanan tras di lomba Aruba a registra mas entrada di turismo cu prome cu e pandemia. Pero ainda tin un caminda largo pa bay. Nos ta ripara esaki tambe den e aumento di tarifa di awa, coriente, gasoline, comestibel, material di construccion etc. Comunidad di Aruba ta sinti e efecto tur dia, e ta notabel cu ainda nos no a sali di dje.
Geo politica tin su efecto riba inflacion. Recientemente durante mi bishita di trabou na Hulanda mi a reuni cu varios colega Parlamentario como tambe diferente departamentonan di gobierno. Mi a sigui e desaroyonan financiero di e poblacion Hulandes. Esaki ta trece e realisacion cu nos no ta e unico pais na mundo cu ta pasando den e retonan fastioso aki.
Un gran parti tin di haber cu e guera entre Rusia y Ucrania. Manera Presidente Rutte di Hulanda ta bisa, e problema ta hopi mas grandi y e efecto ta bay hopi mas leu cu solamente entre e dicho paisnan. E informacion aki no ta yuda nos cartera ni nos poder di compra. Si e ta yuda nos relativa e situacion cu nos ta den awor aki y nos tin cu sigui busca manera pa sali for di dje mas miho posibel.
Compara cu otro paisnan nos pais ta bayendo den un bon direccion, danki na e ayudo cu nos ta hayando di Hulanda, door di esfuersonan di Gobierno di Aruba, di comercio y e manera con nos como ciudadanonan ta desaroyando bou tur e circunstancianan fastioso cu nos ta aden. Hulanda como un partner grandi den Reino Hulandes, un pais hopi respeta den Union Europeo alabes un pais relativamente chikito na mundo ta buscando tur forma di colaboracion interno, como tambe den Reino, Union Europeo y mundo. Nos tambe mester sondea tur oportunidad pa colabora den Reino y internacional.
Ami ta sigur cu esey lo yuda pa nos sali for di e crisis economico cu nos ta aden. Mi mes ta buscando e colaboracion na Aruba y den exterior por ehempel riba e topiconan di seguridad den trafico, husticia y agricultura.
