WEB tin e rol di keda concientiza comunidad y mundo comercial riba uzo prudente di awa y coriente

Alfredo Koolman, Director di WEB Aruba NV:

ORANJESTAD (AAN): Alfredo Koolman, Director di WEB Aruba NV, a relata den entrevista cu Matutino DIARIO, cu nos pais ta bay mira un desaroyo di e ultimo temponan aki, desde 2023 specialmente, unda cu WEB a conoce un demanda enorme di servicio, entre 10% cu 15%.

   “Nos a pensa cu e tabata temporal pero a resulta cu e ta e normal nobo y cu ta indica tambe cu door cu datonan tambe di con e desaroyo ta y tin cu wak unda nos ta bay cu e demanda di energia riba nos Isla, pero igualmente cu awa, anto si nos ta un compania responsabel nos tin bista riba esey, anto cu por planea e desaroyonan anticipa y si nos por, distribui e tempo”, Señor Koolman a señala.

Koolman a indica cu e compania ta tene cuenta cu esey, y otronan tin e maneho pa introduci e decisionnan cu tuma lugar segun e desaroyo ta sigui, y WEB ta pone enfasis na e bienestar di e pais, y tambe concientiza nos comunidad y e mundo comercial pa haci uso prudente di coriente y tambe di awa y mantene e desaroyonan manehabel.

  “E situacion ta cu den Caribe nos tin un di e tarifanan di mas abao, compara cu otro islanan similar cu nos, pero nos ta produci na nivelnan mas faborabel. Sinembargo, apesar cu t’asina tin hende ta comenta cu e factura pa e consumo di awa y di coriente ta halto. Esey ta un manera pa maneha esey, y nos ta keda cu e rol di sigui concientiza e comunidad. Nos ta ripara si, cu e no ta facil pasobra e nivel di calidad di bida na Aruba, den comparacion cu otro paisnan bisiña ta mas halto, señor Koolman a señala. El a subaya cu esaki ta algo cu WEB tin cu sigui traha riba dje, y cada un di nos mester wak e situacion na cas.