ORANJESTAD (AAN): Aruba Wastewater Sustainable Solutions (AWSS), manera a anuncia ta implementado y haciendo test nan
riba e sistema nobo nan cu a instala pa asina stabilisa e operacion di e planta. Den futuro cercano lo sigui inverti responsablemente pa asina sigui mehora e calidad di e awa preto cu ta worde procesa na Bubali pa asina e por sigui worde re-usa
responsablemente.
Nan a anuncia cu desde di 20 November 2025, AWSS lo cuminsa un programa di mantencion preventivo cu lo dura 10 dia riba equipo nan principal cu ta trata e asina yama awa preto.
E mantencion aki ta worde realisa prome cu e temporada halto di turismo di Aruba, pa asegura un funcionamento mas optimo durante e periodo mas druk di tur aña. Mas turista kiermen mas fluho di awa preto pa e planta na Bubali, cu por cierto mayoria hotel nan y comercio ta conecta via di e sistema di riool.
E trabaonan preventivo ta esencial pa mantene confiabilidad, seguridad, y eficiencia di e proceso di trata awa preto na un nivel halto. AWSS ta asegura cu e operacion normal di e planta lo sigui sin interupcion durante e mantencion. Durante e periodo aki lo por tin molester di olor temporario den e zona rond di e planta na Bubali.
AWSS ta asegura tanto na comunidad como na sector comercial cu tur medida necesario ta worde tuma pa minimalisa e molester. E molester aki ta normal durante e tipo di trabao nan aki y apesar di e inconveniencia, no ta representa ningun riesgo pa salud.
“Nos ta agradici di antemano e pasenshi y comprension di nos comunidad y sector comercial mientras cu nos ta completa e trabao nan importante aki," segun directiva di AWSS. "Haciendo e mantencion preventivo prome cu temporada halto di turismo ta permiti nos ta asegura un servicio di trata awa preto di calidad y sostenibel pa Aruba.”
E trabaonan ta premira di keda completa pa 30 di November 2025.
