Wardacosta a evacua pasahero cu a haya atake riba crusero panort di Aruba

ORANJESTAD (AAN): Tabata riba Bierna Santo, den oranan di atardi cu Centro MOC di Wardacosta di Caribe Hulandes,

a ricibi mensahe di urgencia, for di un barco crusero pasando den Caribe cu ta solicit yudansa pa un emergencia medico.

   E mensahe ta pidi pa yuda evacua un pasahero cu a haya atake abordo, y tin di wordo hiba cu urgencia pa Hospital.

   Centro MOC a haya sa cu ta un pasahero di 66 aña di edad, di nacionalidad Aleman, y kende ta riba un barco crusero cu ta bin for di direccion panort di Aruba.

   Wardacosta no a menciona nomber di e crusero, pero DIARIO ta pensa cu ta trata aki di e crusero AIDAperla cu tabata e momento ey riba e ruta di Aruba.  E barco a bandona waf di La Romana (Rep. Dominicana) riba Diahuebs anochi 10:00 pm, pa asina keda Diabierna henter dia riba lama, y Diasabra mainta 9:00 am a yega Aruba.  AIDAperla tin mayoria di su pasaheronan procedente di Alemania, y ta haci viahenan di 14 dia saliendo di Barbados.

   Mesora Centro MOC a drenta den contact cu Docter na Warda di CITRO, kende a constata (despues di a evalua e situacion cu e team di medico riba barco) cu ta trata di un atake (stroke). Inmediatamente a manda e Helicopter pa bula basta leu panort di Aruba, pa topa cu e crusero.  Asina a logra evacua e persona, y bin bek rumbo pa Aruba.

   E Helicopter di Wardacosta a ateriza na Aeropuerto Internacional Reina Beatrix, unda cu Ambulans e pasahero a wordo hiba Hospital pa ricibi tratamento avanza.