Geoffrey Wever a topa cu grupo di hobennan profesional na Hulanda

ORANJESTAD (AAN):  Recientemente, Minister Geoffrey Wever a organisa un evento titula "Mix After Six",

cual a brinda un oportunidad unico pa interaccion entre e minister y un grupo diverso di studiantenan Arubiano na Hulanda.

            Durante e anochi, Minister Wever a logra cera conoci personalmente cu varios studiantenan, y a intercambia den dialogo habri y sincero. E combersacionnan a toca diferente tema, y tambe studiantenan a comparti nan ambicionnan personal y profesional.

            Durante e evento Minister Wever tabata tin e honor di por a ricibi un buki titula "Living Rich As A Student In The Netherlands", scibi pa un autor Arubiano Franklin R. Seute, kende tambe terminando su estudio actualmente - un muestra di creatividad y dedicacion cu Franklin a demostra, scibiendo un buki cu informacion valioso pa otro cu ta sigui den e pasonan di studiantenan.

            Tin un diversidad di aspiracion y e potencial ta enorme pa e proximo generacion di lidernan di Aruba. Minister Wever a expresa su gratitud di por a participa den un intercambio asina, destacando cu "ta importante pa scucha y apoya e ambicionnan di e hobennan profesional". E oportunidad pa networking durante "Mix After Six" no tabata limita na entre e studiantenan y e minister solamente, pero tambe entre e studiantenan nan mes, creando un ambiente colaborativo cu ta yuda forma e futuro lidernan di Aruba.

            Minister Wever a comparti un mensahe di agradecimento y motivacion pa e studiantenan, enfatisando cu, los for di e distancia of tempo, Aruba semper lo ta nan cas. E minister ta anima cu nan esfuersonan y contribucionnan lo ta esencial pa e desaroyo continuo di Aruba.