Warda Costa tabata tin varios invitado riba Zr.Ms.Holland den fin di siman

Gobernador Alfonso Boekhoudt tambe tabata tey

ORANJESTAD (AAN): Diasabra mainta a tuma lugar un encuentro riba barco di Marina Zr.Ms.Holland, unda cu comandante di Warda Costa di Caribe Hulandes Walter Hansen a duna tur esnan invita un bon bini.

Esaki ta inclui diferente figura di mundo di comercio, prensa y asociacionnan manera ATIA, AHATA, CUA.

Dimes Gobernador Alfonso Boekhoudt tambe tabata invita pa e asina yama “Dia di Nabega”, cu e intencion di Warda Costa pa estrecha lasonan cu tur instancia cu cual Warda Costa kier mantene relacion.

E barco a nabega pabao y pa zuid di Aruba, mientras cu tabata tin diferente demostracion riba laman, entre otro di uso di armanan abordo di e barco.

A tene un demostracion cu helicopter tambe, mientras cu e avion Dash-8 di Warda Costa a bula y Metal Sharks tabata activo den laman.

Tur invitado cu tabata sinta riba dek, a wordo deleita cu un tremendo almuerzo Indones prepara pa personal di cushina.