ORANJESTAD (AAN) – Manera ta conoci, Diadomingo ultimo, dia 20 di October, NV Elmar a brinda pueblo di Aruba e oportunidad pa conoce mas di e compania, door di a organiza un “open dag” e dia aki.
Den entrevista cu Audrey Croes, Relacionista Publico y Officer di Comunicacion, el a comenta cu por fin e dia a yega di NV Elmar su open dag, 2024.
El a cuminza 9’or di mainta te cu 2’or di merdia, y esaki ta e evento anual di mas grandi cu cada aña e compania ta organiza.
“Esaki ta un momento cu nos ta habri nos portanan pa comunidad, pa nos clientenan, studiantenan di Electro y henter e pueblo di Aruba, unda nos tey pa comparti informacion, contesta pregunta, demostra e trabao kico ta distribucion di coriente den un dia electrico. Pero tambe pa comparti como famia, den un dia hunto, akinan na ELMAR”, Audrey Croes a expresa.
Tabata tin varios booth, un di nan hopi interesante tabata esun di “e team di meter & conexion”. Nan tabata tin un booth cu a parce un casita, na unda nan tabata mustrando e publico y educando comunidad riba consumo di coriente.
“Tur e aparatonan normal cu bo ta haya den un cas, tabata den e booth aki, p’asina educa e comunidad cuanto coriente cada aparato ta uza”, Audrey Croes a menciona.
Banda di e booth aki tabata tin esun di Storing Dienst, unda cu por a mira e meter y e fuse box, p’asina ora cu tin interupcion di coriente’ “esaki ta e momento cu e ta banda di e cliente mes e instruccion ta; nan tin cu mira den e fuse box mes pa nan sa kico e problema ta”, Croes a relata.
Tambe na otro band’i caminda, pa prome biaha, tabata tin ELMAR su team di keuring, e departamento di DTI, instaladornan reconoci bao di un solo dak, cu a duna informacion over di e proceso di inspeccion, e proceso di keuring.
Tur persona cu ta trahando cas cu kier instala un panel solar, un 'charger' pa vehiculo electrico, por a haci tur pregunta cu nan tabata kier, hasta si nan kier a haya sa e status di nan proceso di inspeccion.
Otro booth tabata e “Line Men” cu ta e tecniconan cu ta traha riba liña, unda cu nan a demostra nan trabao. Audrey Croes a splica cu hasta nan a traha un liña di distribucion, den miniatura, unda a demostra con un metallic balloon, of helium balloon, por afecta un red di coriente. El a splica cu esaki ta algo cu ta sosode mundialmente. Y asina mas informacion a wordo duna durante e open dag di NV Elmar aki, cu tambe a wordo anima pa musica cu Rincon Boys y un DJ. Tabata tin un kids corner, cu weganan electrico cu Elmar mes a traha p’asina e bishitantenan por a experiencia esaki. Y ademas, Colegio EPI a encarga cu F&B, pa recauda fondo pa un biahe di estudio.
