- P’asina no baha cu un suma hopi abao
ORANJESTAD (AAN) Hose Figaroa, Presidente di Federacion di Trahadornan di Aruba (FTA), a menciona den entrevista cu DIARIO relaciona cu e trahadornan importa na Aruba, den e añanan 90, cu ainda no ta mucho cla, kico ta e maneho na Aruba, pa cu importacion di trahado.
E lider sindical a comenta cu mester “watch out” e edad di e trahado cu lo wordo importa den futuro inmediato, pa despues no resulta cu e añanan traha ora di baha cu pensioen lo no ta suficiente pa nan cobra pensioen completo. Esey lo crea cu despues di e ola aki lo bin otro ola cu lo crea problema den futuro, y cu tambe lo bin un grupo cu no por biba di AOV. Pues mester bay regula e forma con ta importa trahado y modifica e forma con e fondo di AOV ta wordo acumula den aña, p’asina ey nan no keda un gap asina grandi di entrada cu mester maneha di AOV.
“Tur eseynan tin consecuencia, pasobra e fondo mester por carg'e. E ta un reto cu tin aworaki nos dilanti, y mi ta kere cu un di e cosnan cu FTA tambe a cuminza cu ne, den ultimo lunanan, ta conhuntamente cu e Fondo di Pension di e sector di turismo, ta duna charlanan na pia di trabao pa purba di splica e trahado cu no solamente ta importante e salario cu nan gana aworaki, pero pa, eventualmente, aumenta tambe e prima cu bo ta duna di pensioen general, pasobra entre mas halto e porcentahe ey ta, mas pension bo por verwacht, na momento cu baha cu pensioen. Pues pa no pensa solamente riba un aumento di salario, sino tambe den un aumento di porcentahe cu bo ta aporta na bo pensioen, pa ora bo baha cu pensioen e suma ta miho”, Hose Figaroa, Presidente di FTA a señala.
