VNO a organiza dia special pa mas di 180 studiante di Colegio Arubano y Colegio Nigel Matthew

Prinsjesdag na Aruba: 

ORANJESTAD (AAN): E di tres di Diadomingo di September, conoci tradicionalmente na Hulanda como ‘Prinsjesdag’, a haya hopi atencion tambe na Aruba e aña aki.

   Representacion di Hulanda na Aruba (VNO) a organiza un actividad Prinsjesdag special pa mas di 180 studiante di Colegio Arubano di Oranjestad y Colegio Nigel Matthew di San Nicolas. E evento a tuma lugar na Ballroom di Paseo Herencia, e localidad temporal di Cas di Cultura.

   Mientras cu Rey Willem-Alexander tabata lesa e troonrede den Koninklijke Schouwburg na Den Haag, studiante Arubano a participa den un dia interactivo riba e significado di Prinsjesdag na Hulanda y su relevancia pa e paisnan den Reino, y especialmente pa Pais Aruba.

   E dia a cuminsa cu un presentacion di Vincent Storimans, Representante suplente di Hulanda na Aruba encuanto e troonrede, e Miljoenennota y e Presupuesto di Reino.

   Ex-Gobernador di Aruba, Fredis Refunjol, a duna un presentacion tocante e presupuesto y e Staatsregeling di Aruba, pa asina e studiante por haya un mihor comprension di e estructura politico di Pais Aruba y di e papel di Parlamento den proceso di presupuesto.

  E studiante di Colegio Arubano a tuma parti den un debate den grupo tocante tema social y politico actual. Nan a defende diferente punto di bista den grupo y nan a haya e chens pa gana medio punto pa e materia di Staatsinrichting. Fredis Refunjol, Vincent Storimans y Matthijs van Beusekom (senior beleidsmedewerker di VNO) tabata miembro di jury durante e debate.

   Representacion di Hulanda na Aruba ta sumamente orguyoso cu e manera entusiasma cu tur studiante a participa!