Conservacion di naturaleza a bira un punto central di agenda pa Unesco
*Revolucion tecnologico mester ta posibilidadnan nobo pa tur hende
*Futuro di edificionan di scol tambe topico di comunidad internacional
ORANJESTAD (AAN) —Inteligencia Artificial por sostene educacion pa medio di automatisacion di tareanan administrativo na schoolnan cu resultado cu maestronan tin mas tempo disponibel pa nan trabou como educador y tambe pa alcansa un mihor relacion personal cu e studiante.
Esaki mester ta e tarea principal di Inteligencia Artificial cu no mester reemplaza e educador y sistemanan educativo mester wordo prepara y introduci den cooperacion entre ciencia y educador, creando asina un mihor base educacional.
Na mes momento mester basa e avance tecnologico ariba un cooperacion cu ta permiti igualdad pa tur hende pa asina garantisa cu e ta un adelanto mundial real y tambe ta acesibel pa tur studiante.
Segun e agencia di Nacionnan Uni, Unesco, mester garantisa cu Inteligencia Artificial ta alcansabel mundialmente y cu studiantenan ta bira conoci cu e beneficionan di Inteligencia Artificial pero tambe e riesgonan cu e ta contene.
Den informacionnan cu ta mira luz den e revolucion mundial cu avance computerisa, digital, ta entrega na mundo, Unesco ta adverti cu tin dos banda di e medaya.
Manera e ta ilustra, Inteligencia Artificial por inovacion importante den e sistema educacional mundial actual y ta sostene adelanto importante den enseñansa, educacion y desaroyo di hende.
Esaki ta conduci na progreso, cu te awor tin tur atencion ora papia di Inteligencia Artificial, cu ta un nomber cu hopi hende ni sikiera conoce of ta comprende.
E riesgonan cu Inteligencia Artificial ta contene den su conkista di mundo, no ta bini dilanti den presentacionnan oficial di maneho y cuadro di regulacion cu e ta exigi.
Unesco ta mustra ariba e importancia pa e posbilidadnan di Inteligencia Artificial, pa medio di e agenda 2030 di Nacionnan Uni, den programanan di Enseñansa inclui tur hende y ta basa ariba igualdad.
Inteligencia Artificial mester habri porta pa mas conocemento, mientras e ta sostene e investigacionnan cu mester wordo haci mescos cu e ta reconoce e diversidad di expresionnan cultural.
UNESCO ta mishi cu uno di e reservavan grandi cu hopi gremio na nivel internacional ta mantene enfrente Inteligencia Artificial, cu por conduci na mas seperacion entre paisnan y ta mishi cu expresionnan cultural y nan diversidad.
Esaki ta conduci na mas division mundial mientras cu e intencion ta pa Inteligencia Artificial bira un revolucion na fabor di tur hende pa medio di conocemento y innovacion.
Unesco ta ofrece posibilidadnan pa personanan cu un posicion cu ta mishi cu leynan di enseñansa y educacion, comprende e desafio di Inteligencia Artificial.
Unesco ta atende cu e interes di tanto e studiante y e educador y ta ofrece guia den e adelanto di Inteligencia Artificial na mundo.
DIARIO for di prome cu Pandemia a cuminsa y ta sigui asisti Aruba den e realidad di Inteligencia Artificial cu e pandemia Covid-19 a duna un nificacion special na 2020.
Mientrastanto aparte di Unesco na un plataforma inrternacional ta keda presenta e realidad cufuturo di educacion mundial lo ta uno cu un caracter mas personal den cual tecnologia lo ta un parti integral pa sostene e habilidadnan di cada persona.
Na un forma creciente instancianan mundial ta uni pa atende cu e resultadonan mundial cu inteligencia artificial tin pa comunidad mundial.
Inteligencia artificial ta asisti den e posibilidad di corda y mantene den memoria puntonan importante den acercamento critico di materia, pensamento, colaboracion y educacion.
E ser humano ta haya e capacidad pa maneha mas instrumento importante den su educacion y asina por crea un futuro pa su mes a base di conocemento di tur loke mundo por ofrece pero e forma cu e por ofrece su habilidadnan na mundo.
Esaki ta sumamente importante den e desaroyo personal di profesionalnan ariba tereno mundial, cu ta haya e posibilidad pa personalmente habri portanan internacional pa nan futuro a base di e comunicacion cu Inteligencia Artificial ta permiti.
E revolucion di Inteligencia Internacional ta transformando educacion rapidamente sigur cu asistencia di internet cu lo conoce mas desaroyo pero por lo pronto ya a conoce un desaroyo cu a permiti pa e habri porta pa adelanto.
No ta solamente e posibilidadnan pa hende sigui studia pero e forma con esaki lo transcuri ta hayando hopi atencion.
Kico ta e futuro di edificionan di school cu lo conoce cambio tambe den e forma cu enseñansa ta desaroya y metodonan nobo pa pasa conocemento na generacionnan nobo ta mira luz.
Edificionan di schoolnan a cuminsa nobo cambio den e forma tambe cu educacion a cuminsa conoce cambio y cu DIARIO lo sigui presenta na su lectornan.
Pa e maestronan lo tin un epoca nobo. Cu asistencia di sistemanan basa ariba Inteligencia Artificial, nan por habri portanan nobo den edificionan di school cu ta basa ariba basenan nobo di comunicacion di hende, cu den futuro lo ricibi un base personalisa pa su estudio mientras presentacion di materia lo haya un toke nobo.
DIARIO lo sigui informa Aruba ariba e base di su futuro, cu ta sigur tambe cambionan importante den enseñansa, cu ta e porta pa futuro di muchanan cu lo conoce rutanan moderno pa alcansa e momento pa nan bira lidernan di nan pais.
Por lo pronto ta keda un hecho, pa cual Unesco tambe ta adverti, cu mester tene consideracion cu pro y contra di cambionan cu por bini y elimina peligernan pa alcansa progreso cu Inteligencia Artificial por entrega na henter mundo!
