Vivienda a kima completamente madruga na Tamarijn

*Hernando Gonzalez y su señora a keda cu e paña cu nan tin bisti so

ORANJESTAD (AAN) – DIARIO a entrevista señor Hernando Gonzalez, ken ta doño di e trailer- cas cu e cu su casa tabata tin como vivienda y cu a kima completamente, na Tamarijn.

El a conta cu banda di 3’or di madruga su casa a lanta pa bay baño el a mira huma, y ora a habri e porta di baño el a wak hopi candela. E baño ta na parti pafo na parti patras, el a menciona.

Su casa a avis'e di e situacion y mesora Hernando a sali busca slang pero e candela tabata biniendo hopi duro. El a ripara cu den un parti di e dak e candela a keda manera retene paden y no kier a bin afo y ora brandweer a yega a mira cu e cas di bisiña tambe a haya un tiki di e candela.

E ta pensa cu kizas e origen di e candela a surgi patras di e cas unda e tin un lugar chikito di carpinteria, pero e no ta traha eynan den dia, pero den e lugar awa no ta liek ni a drenta awa di yobida, no obstante e ta pensa cu ta palo mes a coi candela, podise pa un corto circuito.

El a comenta cu tristemente e no tin trabao ya pa cuater luna caba. E tabata traha cu un contratista pero a perde trabao y awo ta subsisti un tiki cu  FASE.

Hernando Gonzalez ta conoci den e mundo futbol na Aruba, ya cu el a fungi como referee y a hunga pa diferente ekipo, y hopi hende ta yame pa brinde ayudo, danki Dios. E ta spera cu lo haya mas ayudo pasobra e ta den un situacion sumamente preta.

Dos di su bisiñanan a ofrece un camber cu nan tin bashi den nan respectivo cas unda e por keda. E cu su casa ta hopi gradici pa esaki, pero nan pensa cu nan mes tin cu sali dilanti, y cu ta bon pa ricibi ayudo, pero no pa stroba ningun persona. Tin hende a bin cu chubato pa e por saca afo tur e material kima. Finalmente, el a expresa cu e cu su casa solamente a keda cu e paña cu nan tin bisti.

Danki Dios e pareha no a sufri daño personal, pero realidad ta cu nan tin cu cuminza for di cero awo, y ohala cu e generosidad di pueblo di Aruba, nan lo por bolbe lanta nan vivienda y parti di loke nan mester.