HOH tin un codigo di conducta - * Ta lamenta cu e cartanan interno ta contene un banda di e medaya so
ORANJESTAD (AAN): Dos carta a wordo manda pa prensa riba diahuebs cu informacion cu tabata menciona e nomber di un docter trahando na Dr. Horacio Oduber Hospital.
Relaciona cu e situacion aki, e siguiente informacion a drenta na mesa di redaccion: Hunta di Directiva di Dr. Horacio E. Oduber Hospital a wordo informa cu dia 26 augustus 2021, dos carta interno relaciona cu un Specialista Medico a ser manda pa algun miembro di prensa.
Ta importante den casonan asina pa semper tende tur dos banda di medaya:
Na mei 2021 Hunta di Directiva a ricibi copia di e cartanan aki. Despues di a ricibi e cartanan aki Hunta di Directiva a cuminsa inmediatamente cu un investigacion interno.
Durante e investigacion aki a scucha diferente persona y a base di esaki HOH a conclui cu no tin un keho concreto pa sigui pasonan necesario. Pues loke ta wordo menciona den e cartanan aki ta solamente basa riba rumor.
Recientemente tambe Hospital a saca un codigo di conducta pa loke ta conducta indesea pa informa tur empleado encuanto e importancia di un ambiente di trabou unda nan ta sinti nan mes sigur y ta wordo trata cu respet. Tur tipo di conducta indesea ta ser condena categoricamente pa Hunta di Directiva y ta tuma tur medida necesario, y te hasta yega na terminacion di contrato laboral, dependiendo di e seriedad di e infraccion.
Hunta di Directiva ta lamenta cu e cartanan interno cu ta contene un banda di e medaya so ta wordo comparti sin aprobacion y sin ningun consideracion pa cu derecho di privacidad di e persona nan concerni.
Hunta di Directiva di HOH a cuminsa un investigacion encuanto e asunto aki y ta considera pasonan severo pa esnan envolvi.
Tur empleado di HOH ta na altura cu ta prohibi pa comparti informacion di cualkier tipo cu tercero (nan) y ta spera di por sigui conta cu sosten di e maneho aki for di tur colega di HOH. Privacidad di pashent y empleado ta keda prioridad!
