Visual Voices 2023 Exhibicion di Fotografia den ArtisA na San Nicolas

Un programa di Y’s CARE di YMCA

ORANJESTAD (AAN):  Visual Voices Photography  ta un Proyecto cu a origina den e programa conoci di traimerdia di YMCA cu ta yama Y’s CARE di YMCA di Aruba.

            E Proyecto cu a inicia na 2019 na YMCA na San Nicolas, a keda cancela pa dos aña debi na e pandemia di COVID 19. Gracias na e entusiasmo y esfuerzo di e supervisor di Y’s  Care , ms Inki Geerman e Proyecto a bira un bes mas un realidad na 2022. Un sublime comeback! Un espectaculo sin igual.

            Pa 2023, Visual Voices Photography, lo trese padilanti e creatividad di e hobennan entre e edad di 10 pa 11 aña. Na unda nan ta trece padilanti un “ state of art exhibition” na unda nan ta proyecta e mundo dor di e lens di nan camera.

            Un total di 24 obra di fotografia excepcional a ser escogi pa bin na bida cu nan originalidad y profundidad durante e exposicion den  ArtisA Gallery na San Nicolas.

Cada piesa ta “showcase” e participante su exploracion y comunicacion cu su comunidad atravez di su “vieuwfinder” di su camara. Tur esaki bao di guia y direccion di e profesional Canades Randy Bullerwell.

            E studiantenan a siña e aspecto tecnico di fotografia, mientras cu nan por a crea nan propio perspectiva y style.

            E expo lo ta den ArtisA Gallery den Promenade na San Nicolas, Diasabra 29 di April, desde 07:00 pm – 09:00 pm. Yega un y tur y join den e mundo magico di e hobennan, na unda nan ta demostra talento, resilencia y conoce asina e imagennan talentoso di e grupo aki. 

            Un biaha mas, manera tur aña, un cariñoso palabra di gradicimento na e director di ArtisA, sr. Tito Bolivar cu sin puntra mes, ta hasi e exposicion un realidad. Un danki na e team di ArtisA.

            Esaki ta demostra un biaha mas cu Arte ta crea, Arte ta un simple fenomeno pa comparti y ta e vehiculo pa haci di e soño di nos muchanan, UN REALIDAD.

Danki YMCA pa tin e arte visual como un di e enfokenan pa trese Arte cerca di nos muchanan.