VideoLand a lansa trailer nobo di e serie 'Maxima'

ORANJESTAD (AAN): Despues di e exito di e serie 'The Crown', cu ta basa riba monarkia Britanico,

un serie di otro miembro di e Famia Real, pero e biaha aki, esun Hulandes a cuminsa haya atencion internacional.

             E miniserie 'Maxima' ta un di esnan mas anticipa na Hulanda y Argentina, na unda Reina Maxima ta conta cu amor y orguyo di ciudadanonan di su pais natal.

            Diabierna pasa, den conmemoracion di e 22 aña di e boda real di Reina Maxima y Rey Willem-Alexander, e compania productor encarga cu e serie, a comparti un trailer nobo y potretnan di e serie, cu a causa emocion entre esnan cu ta hopi ansioso pa wak esaki.

            Na September di aña pasa, a traves di rednan social di VideoLand, e productor Hulandes encarga cu e produccion di e ficcion, a comparti un trailer chikito, pero a dicidi di publica e trailer completo di e serie y finalmente a revela cu su estreno lo tuma lugar dia 20 di April, aunke no a indica riba cua plataforma.

            “E trailer di 'Maxima' a mustra e dia di bruid di Willem-Alexander y Maxima, nos ta feliz di por regala boso e imagennan maraviyoso di e historia di amor real. Esaki lo wordo estrena dia 20 di April!”, segun un reel di e actriz Delfina Chaves, cu ta interpreta Reina Maxima, riba su cuenta di Instagram, cu ta conta cu 1.2 miyon di seguidor.

            Riba e video por a wak un parti di e bida di e Reina na Argentina, desde su infancia hasta dia cu el a termina su estudio como Economista. Ademas, e momento cu e ta bandona su pais natal pa cuminsa su carera na Wall Street y, finalmente, ora el cera conoci cu Prins Willem-Alexander den un fiesta na Sevilla, Spaña.

            E actor Hulandes, Martijn Lakemeier ta interpreta Prins Willem-Alexander. Segun e clip, Maxima tabata a punto di rechasa Willem-Alexander pasobra e “no sa balia”.

            E miniserie di seis episodio di 50 minut ta inspira den un buki di e periodista Hulandes, Marcia Luyten, 'Patria, e prome añanan di Maxima Zorreguieta', y a wordo filma den varios lugar, incluyendo Merca, Argentina, Hulanda y Spaña.