Consulado Mericano di Curaçao a anuncia
ORANJESTAD (AAN): Bon noticia ricibi di Consulado Mericano cu sede na Curaçao! E mision di Merca den Caribe Hulandes ta orguyoso di anuncia e cohorte 2024 di e programa di beca di e programa “Young Leaders of the Americas Initiative” (YLAI) patrocina di US State Department. Dos lider hoben di Aruba y uno di Curaçao a wordo selecta.
Lanza na aña 2015, e Programa di Beca di Young Leaders of the Americas Initiative (YLAI), ta e programa insignia di US State Department pa empresarionan emergente y lidernan empresarial di hemisferio occidental. Durante un programa di intercambio di cinco siman totalmente financia, e beca ta ofrece e becadonan di YLAI e chens di mehora nan habilidadnan di liderato y empresarial via di experiencianan practico, curso online, y formamento presencial. E beca YLAI ta fomenta e relacionnan comercial y conexion entre entrepreneurs na Merca y esnan di Latino America, Caribe, y Canada.
E cohorte di Dutch Caribbean 2024 a wordo forma pa:
(1) Juan Gabriel Alberto Vicario di Curaçao. Juan ta traha den e sector di servicionan empresarial como CEO y propietario di Mark-a-Web Services. E compania ey ta un consultancy ai proteccion di data cu ta traha pa implementa tecnologia pa automatizacion di fluho di trabao, e procesonan robotico, y automatizacion di A.I., y ta ofrece entrenamento y certificacion pa empleadonan den e area aki, y tambe den Standardnan di ISO.
(2) Julissa Ras, di Aruba. Julissa ta traha den sector di productonan di papel como Director y Marketing Manager di ‘Paper Sisters’. Esaki ta pa e muhernan di Aruba entre 24 y 45 aña di edad buscando articulonan di papeleria di calidad halto, Paper Sisters ta un compania minorista cu ta ofrece articulonan di papeleria exclusivo di calidad impecabel.
(3) Stephanie Pietersz, di Aruba. Stephanie ta traha den e sector di energia y di medio ambiente como Managing Director di Stezo Electric Solutions. Pa e Arubianonan y turistanan ecologico cu ta busca formanan alternativo di transporte, Stezo Electric Solutons ta ofrece un forma sostenibel y cu respet na medio ambiente pa move y explora Aruba, contribuyendo pa haci comunidad mas saludable door di produci cero emision.
Si bo ta un entrepreneur entre 23 pa 35 aña di edad, y bo kier expande bo negoshi y siña habilidadnan nobo, e Programa di Beca YLAI ta pa bo. Bo por haya mas informacion di esaki riba e website:
E programa di YLAI ta patrocina pa US Department of State, cu fondo suministra pa gobierno Mericano, y sosteni den su implementacion door di IREX.
