Audrey Croes, Relacionista Publico di NV Elmar:
*Uza panel solar ta beneficia Elmar
ORANJESTAD (AAN)—Den entrevista cu DIARIO, Audrey Croes, Relacionista Publico di NV Elmar, a indica cu aña pasa, na Juli, e compania a instala un departamento nobo di inspeccion di panel solar. Haci inspeccion di panel solar ta sumamente importante, Croes ta enfatiza.
Antes tabata tin un departamento cu a eherce dos tarea, pero awo no mas. Croes a splica cu aworaki e periodo cu ta dura pa inspeccion ta entre tres pa cuater luna, compara cu pasado cu tabata seis luna.
Den e tres cu cuater luna tin e tarea di DTI. Pero e average di tempo aki ta considerando cu tur cos a wordo haci di forma corecto, cu tur documento a wordo entrega, etc., Audrey Croes a menciona.
El a splica pakico NV Elmar ta haci inspeccion di panel solar. El a bisa cu energia solar ta fluctua y ta depende di e condicion ambiental, si tin biento, nubia, etc.
“Elmar tin cu cumpli cu un voltahe, un calidad di suministro di coriente. Y door cu e energia solar ta fluctua e ta afecta e ora ey e calidad di e grid. Esaki ta e motibo pa cual nos ta haci inspeccion di energia solar, ademas cu si bo cas of edificio no ta gekeurd bo no tin un inspeccion aproba, y en caso cu e kima bo no ta haya bo seguro. Esaki a yega di pasa cu edificionan cu e solo panels a kima y nan no a haya placa di seguro. Esaki ta pa proteha bo mes. Corda cu nos ta papiando aki di instalacion di coriente y semper bo mester considera e seguridad”, Audrey Croes a señala.
Croes a indica cu tin biaha nan ta haya feed back cu Elmar no ta desea pa e consumidor haya solar panel, y tipo di cosnan asina, cual no ta corecto.
“Nos mester corda cu e prijs di coriente residencial, ta bao cost prijs. E cliente residencial ta paga un prijs cu ta bao di e costo cu Elmar ta cumpra coriente. Kiermen, Elmar no tin ganashi cu e pueblo di Aruba, pasobra nos proposito ta suministra coriente na nos poblacion. Pues, ora un cliente residencial ta pone un panel solar, e ta na beneficio di Elmar tambe pues e ora ey e cliente no ta usando suministro di e grid di Elmar. Pa e motibo aki Elmar no ta para ningun hende di pone panel solar, numa cu inspeccion ta sumamente importante pa proteha e calidad di e grid”, Audrey Croes a splica.
