Venezuela ta preparando pa Dr. José Gregorio Hernández y Soeur Carmen Rendiles wordo declara  ‘santo’

CARACAS: Den un ambiente yena cu fe y debocion, miles di fiel Venezolano a participa Diasabra anochi den un emocional ‘Ruta Nocturno’ dedica

na e beatonan Carmen Rendiles y José Gregorio Hernández, un evento cu ta anticipa nan inminente canonizacion como e prome santonan di Venezuela.

   E procesion cu a ilumina cayanan di centro historico di Caracas, a culmina na e Iglesia iconico di La Candelaria, simbolizando e speranza y e unidad di pueblo pa cu e etapa spiritual grandi aki.

   Tur cos a cuminza ora cu e fielnan di e dos personanan admira aki a aglomera na Plaza de La Pastora, cu ta un punto neuralgico di e tradicion catolico na Caracas.

   Bao di e cielo di anochi, multitud di hende canando cu bela y rosarionan den man, a cuminza cu un parada acompaña cu imagennan venera di e beatonan.  Tambe tabata canando cu bandera Venezolano, y tabata cantando cancionnan gospel.

   E estatuanan cu nan tabata uza pa e procesion, tabata yena cu flor y ilumina cu luznan.  E ruta nocturno a wordo organiza pa Arquidiocesis di Caracas, como parti di e celebracionnan na caminda pa e canonizacion.  Nan a pasa den barionan di La Pastora y Santa Rosalia, evocando e bida di servicio di e dos icononan Venezolano aki.

   Canonizacion di e dos beatonan aki, lo tuma lugar Diadomingo dia 19 di October na Vaticano door di Papa Leo XIV.  E siguiente Diasabra, 25 di October, lo tin e ceremonia tambe na Venezuela den Stadion na Caracas.

   Storia di Docter: José Gregorio Hernandez conoci como e “Docter di Pobernan”, ta un figura legendario na Venezuela.  El a nace na 1864 na Isnotú, e laico catolico aki a combina su conocemento cientifico (cu lesnan haya na Paris y Madrid), cu yudansa sin stop na esnan cu mas tin mester di docter.  Su morto tragico na 1919, ora cu el a wordo atropeya na Caracas, a crece aun mas su culto popular.

   El a wordo beatifica na 2021 door di Papa Francisco, su intercesion a wordo atribui na numeroso milagro, specialmente unda pashentnan a wordo cura di tal forma, cu ta solamente un milagro por a haci esey.

   Storia di Soeur: Carmen Rendiles (1903-1977) ta fundadora di Siervas de Jesus, y a dedica su bida na servicio di clero y di esnan bibando na forma marginal na Caracas.  El a wordo beatifica na 2018, su causa a avanza cu e aprobacion di un segundo milagro na Maart 2025.

   Tur dos figura ta representa e fusion di fe, caridad, y patriotismo, resonando na un pais cu ta buscando speranza mey-mey di retonan grandi.

   Riba Diadomingo 19 di October, tanto José Gregorio Hernández y Carmen Rendiles lo bira e prome santonan di Venezuela, hunto cu cinco otro beato di diferente nacionalidad.

   E fecha ey ta co-incidi cu e Dia Mundial di Misionnan, bao di e lema “Misioneronan di speranza entre pueblonan”, subrayando e legado universal di e dos Venezolanonan aki.

   Na Venezuela, e celebracionnan lo no stop.  Arquidiocesis di Caracas a prepara un simposio na Roma dia 17 di October, tambe un concierto grandi cu e Sistema Nacional di Orquesta dia 20 di Juli (cu ya caba a socede), y un misa multitudinario na Stadion Olimpico dia 25 di October.