Parlamentario Carlos Bermudez:
Enfoke principal ta e situacion y bienestar di studiantenan Arubano
ORANJESTAD (AAN) – Durante su bishita oficial na Hulanda, Parlamentario Carlos Bermudez a forma parti di varios reunion importante, entre otro un reunion cu e Ombudsman Hulandes, señora Reinier van Zutphen. E reunion aki a tuma luga diaranson ultimo, y Parlamentario Bermudez a expresa cu e ta considera esaki como un di e reunionnan mas importante durante su estadia.
Durante e reunion, tabatin un presentacion hopi informativo cu su enfoke principal riba e situacion y bienestar di studiantenan Arubano cu ta bay Hulanda pa sigui nan estudio. Un di e puntonan clave cu a wordo discuti, tabata e BSN-nummer (nummer di registro civil) cu, for di april 2024, por wordo obteni prome cu nan salida pa Hulanda. Esaki ta un paso positivo pa facilita e proceso di integracion.
Un otro punto preocupante cu a wordo trata, tabata e falta di huisvesting apropia. Segun Bermudez, esaki ta un problema serio cu ta existi hopi aña caba. Studiantenan cu logra haya un studentenkamer, ta haya esaki solamente pa un aña, despues di cual nan tin cu busca un otro luga pa biba, cual ta crea tension y ta afecta negativamente nan concentracion riba estudio.
Cuido y seguro medico basico tambe a drenta den e discusion. Bermudez a destaca cu, contrario na e studiantenan Hulandes, nos studiantenan Arubano no ta haya cuido automatico apesar cu nan ta parti di mesun Reino. “Esaki ta un punto cu mi a trece tambe den Eerste Kamer. E Hulandesnan somehow ta lubida cu Aruba, Corsou y Sint Maarten tambe ta parti di Reino. Door cu nos ta leu, nan ta lubida un poco riba nos. Mi ta haya falta di e sentimento familiar aki di parti di Hulanda,” Bermudez a expresa cu preocupacion.
Un di e puntonan mas alarmante cu a surgi durante e presentacion, tabata e cantidad di casonan di problemanan psicologico di e studiantenan Arubano na Hulanda. E cifranan ta alarmante y recomendacionnan a wordo presenta pa Aruba deal cu e situacion aki. Bermudez a enfatisa cu Gobierno di Aruba mester tuma esaki cu seriedad y duna prioridad na bienestar mental di nos studiantenan na Hulanda.
E asunto di prestamo via DUO of via Aruba, tambe ta causa preocupacion. Na Hulanda, e sistema ta evalua automaticamente kico un studiante Hulandes por paga despues cu e gradua. Na Aruba, hopi biaha e hobennan ta wordo cobra sin un evaluacion pa sa si nan por paga e suma, cu ta pone un carga financiero innecesario riba nan.
E problema di Parkietenbos, particularmente cu e maneho di desperdicio, incluyendo containernan di desecho medico, tambe a wordo discuti den e reunion. Segun Bermudez, Aruba ainda no a yega na un solucion concreto y duradero pa esaki.
Por conclui, Parlamentario Bermudez a expresa, cu e reunion cu Ombudsman van Zutphen a bay hopi bon. E ta haya positivo cu Ombudsman Hulandes ta dispuesto pa traha cu Ombudsman di Aruba, señora Jurima Bryson, y ta compromete su atencion na e diferente puntonan cu a wordo treci durante e reunion.
