Aki tin e entrada pa e Ballroom
ORANJESTAD (AAN): Manera cu DIARIO a trece siman pasa caba dilanti, riba Diahuebs 9 di October venidero, Iberostar na Aruba ta organizando un Job Fair pa asina yega monton di puesto cu ta habri aworaki tanto na nan resort JOIA Aruba na Eagle Beach, y tambe na Tierra del Sol na Westpunt.
Tanto Suzette Bareño di Recursonan Humano, y tambe Dominique Meyer kende ta Resident Manager na Iberostar, a indica cu nan Job Fair e siman aki ta wordo yama: “Ready, Set & Hired!” y lo ta for di 10:00 am te cu 4:00 pm na e Ballroom aki.
Pa bo yega eynan, djis bay west riba e rotonde dilanti Eagle Bowling rumbo pa Eagle, y e Ballroom ta aki banda panort di e resort, cerca di Shoco Boulevard.
Ora bo drenta den e foyer di e Ballroom, lo tin diferente station cu informacion. Uno pa Food & Beverage, uno pa Cushina, uno pa Front Office, uno pa Housekeeping, y uno dedica pa Tierra del Sol.
Esey ta bin debi cu nan tin diferente posicion habri, den diferente departamento, incluyendo di F&B, tambe Front Office, Cushina, Housekeeping, y den SPA, y tambe na Tierra del Sol Golf Course.
Documentonan: Corda cu bo por haya empleo e mesun dia ey, pues pesey ta importante pa bo trece e siguiente documentonan: (*) Un curiculo (CV) actualiza. (*) Un identificacion oficial valido. (*) Un permiso di trabao valido (si acaso esaki ta aplicabel). (*) Un carnet di salud si acaso bo ta interesa na traha den F&B of Cushina. (*) Dos referencia minimo pa asina por haci referencia di bo.
E proceso completo por dura kizas 1 ora, y e candidato cu ta cualifica por sali cu un oferta di trabao e mesun dia. Nan ta recomenda pa aplicantenan yega cu e documentonan aki, y bin prepara den bo mihor version pa bo ricibi un entrevista cu nan.
