Veld di Sport Club United na Boegoeroei tambe lo haya FIFA Arena

Ministro Gerlien Croes cu bon reaccion

ORANJESTAD (AAN): Minister Gerlien Croes, hunto cu AVB, FIFA y Lotto pa Deporte, a anuncia e di dos localidad di Mini Turf na Aruba.

   Esun prome escogi ta e veld di S.V. Unistars na Pos Chiquito.  Den fin di siman a anuncia cu e veld di Sport Club United (antes veld di Jong Aruba Lifida), lo bay haya e di dos Proyecto 'FIFA Arena”.  Asina e ta un paso mas pa fortalece e infrastructura deportivo di Aruba.

   E proyecto innovativo ta contempla e creacion den Fase-1 di dos mini turf na dos veld cu a wordo selecciona entre Gobierno, AVB hunto cu FIFA. E prome pues ta di SV Unistars, y e otro ta di SC United.

   E iniciativa ta forma parti di un programa piloto global di FIFA, y Aruba ta honra di wordo selecta como un di e locacionnan pa implementacion. E veldnan aki ta wordo acopla na vecindarionan di scol of clubnan cu tin teamnan activo di mucha y hoben. E iniciativa aki ta banda di e inversionnan cu lo tuma luga tambe pa veldnan grandi di turf.

   Minister Gerlien Croes a confirma den un carta oficial dirigi na AVB dia 22 di mei ultimo, cu Gobierno di Aruba ta brinda apoyo total na e proyecto, y cu preparacionnan inicial a cuminsa den forma di reunion cu stakeholdernan local relevante. Consulta cu instancianan gubernamental y otro partnernan ya ta tumando luga, y e siguiente fase lo envolvi coordinacion operacional pa por prepara e terenonan.

   E proyecto ‘FIFA Arena’ lo fortalece nos infrastructura deportivo y amplia e oportunidadnan pa nos hubentud pa participa den deporte den un manera accesibel. Ministerio di Deporte ta compromete pa sigui traha man den man cu FIFA, AVB y stakeholdernan relevante pa sigura implementacion exitoso.