Parlamentario Jennifer Arends-Reyes
ORANJESTAD (AAN): Segun Parlamentario Jennifer Arends-Reyes e dianan aki ta marca dianan cu yen di emocion den cada cas di famia cu tin un yiu of ruman cu a dicidi di sigui nan estudio den exterior. Hopi di nos studiantenan ta bay laga nan famia atras y ta bay busca un mihor futuro door di sigui un estudio avansa. Esaki sigur ta un paso sumamente positivo y cu mester sigui stimula.
Na momento cu bo yega un pais cu ta un pais grandi y desconoci e por ta algo impresionante. Pesey ta bon semper pa nos studiantenan ta bon prepara mentalmente pa e cambio drastico aki, caminda cu tur e balornan cu bo mayornan y grandinan a inculca den bo tin cu bin bek dilanti.
Momentonan lo presenta unda cu bo por escoge entre e caminda corecto of esun cu por desvia bo na yega bo metanan. Awor e etapa crucial den bida di cada studiante ta cuminsa unda cu mester tin un bon comunicacion cu mayornan pa asina informa nan di tur locual ta experienciando sea bon of menos bon.
“Studiantenan, mi mensahe na boso ta pa bay cu mente habri caminda cu bo lo kier siña di e cultura nobo y tambe principalmente practica papia e idioma. Semper rondona bo mes di personanan cu ta sano y cu tin mesun meta cu bo. Semper keda cu e sentimento di hermandad pa otro, ora cu bo ta wak un amigo di bo ta bay den un caminda cu no ta corecto, pasobra tentacion lo tin hopi, como un bon amigo of conocir papia cu ne y sigui motiv'e y yuda otro pa yega na boso metanan. Cuida bo salud y hiba un bida saludabel y responsabel.
E temporada di studiante mester ta uno bunita y memorabel den bo bida. Haci uzo di e recursonan y informacionanan cu bo ta haña di parti di Cas di Aruba y tur e mentornan. No keda cu pregunta, puntra bo derechonan y obligacionnan. Nunca tuma decisionan grandi sin consulta cu bo mayornan of mentornan. No tin berguensa pa pidi ayudo of ayudo profesional. Tur tey pa yudabo den bo formacion como un adulto profesional”.
E escogencia di un estudio mester ta algo cu e studiante mester tin afinidad pe y ta gusta. Percura pa a ricibi bon y suficiente informacion di e cuponan di trabou den e ramo aki prome cu inverti den un estudio den exterior. Na final di dia tur studiante cu ta escoge pa sigui studia sea ta na Aruba of den exterior e ta un inversion costoso y e meta ta pa logra haya un trabou na momento cu termina e estudio cu exito. Sra Arends-Reyes ta sigui amplia, “Un otro punto cu mi persona ta haya valido ta cu hopi departamentonan, organizacionnan y companianan di sector priva y sector publico lo mester por habri porta pa mas "stagiaires" pa asina nos studiantenan por haya experiencia den nan futuro trabou den nos sector laboral”.
Sra. Arends-Reyes ta di opinion cu na momento cu nos yiunan di tera termina nan estudio exitosamente lo ta bon pa duna nan prioridad ora nan solicita pa trece nan cas bek y pa asina nan contribui cu nan conocimento nobo pa e desaroyo di nos pais. Aruba lo mester tuma nan man habri bek, e costo di bida den exterior ta hopi mas halto cu Aruba y nan lo ta desea di bin bek pa yuda e.o. cu e economia di conocimento di nos pais y pa bin bek cerca nan famia na Aruba.
Arends-Reyes ta finalisa su mensahe “Cu determinacion, fe y perseverancia tur nos studiantenan lo logra nan meta cu exito! Cu nos creadoor drama su bendicion ricamente ariba cada un di nan y guia nan den e reto nobo aki!”
