Varios truck ta tira awa di pos den naturaleza na lugar di hib'e pa RWZI Parkietenbos y Zeewijk

Minister Arends hayando hopi keho rond di Aruba:

*Minister hunto cu BCI a atende esaki 

ORANJESTAD (AAN) – Minister Ursell Arends, titular di Transporte, Medio Ambiente, Integridad y Asunto di Adulto Mayor, den un entrevista cu DIARIO a duna di conoce cu e ta ricibiendo keho di varios bario rond di nos Isla, mirando cu desde cu a topa cu e problematica di RWZI y Parkietenbos, a haci cambio cu tur e autonan di chica pos.

            E mandatario a splica cu e trucknan septic aki mester a hiba nan awa pa RWZI na Zeewijk, y lamentablemente, tin un total di 73 truck cu ta registra na DOW pa haci entrega di awa, pa haci e tipo di trabao aki. “Pero nos a tuma nota cu desde cu RWZI na Parkietenbos a bay for di operacion, un cantidad minimal di alrededor di 40 auto, e trucknan aki so ta hibando e awa na RWZI na Zeewijk”, Minister Arends a señala.

            El a agrega cu esey ta duna di conoce cu nan ta eherciendo e trabao pero e awa ta wordo deposita na otro caminda. “Haciendo un poco di research y cu ayudo di Bureau City Inspector (BCI), nos a sali pa asina averigua na tur e barionan di unda kehonan ta drentando, pa wak si acaso esaki ta tumando lugar, y nos a encontra trucknan cu ta bin tira awa di pos den nos naturaleza y esaki a wordo atendi, y alavez nos a conecta cu polis den e situacion aki, mirando cu loke nan ta kibrando ta articulo 55 di e ‘Algemene Politie Verordering’ y cu BCI y DNM tin solamente autoridad pa duna advertencia” e mandatario a señala.

Minister Arends ta kere cu esaki ta un mensahe pa tur e companianan cu ta eherce e trabao aki.

            El a indica cu RWZI na Parkietenbos ta bay bolbe drenta den funcion dentro di poco, esta e prome siman di Juli. Un bez cu esaki drenta den funcion, e awa ta wordo ricibi completamente gratis pa e companianan. “Pues, e no ta bay tin ningun costo y mi ta spera cu nan por cuminza cumpli cu ley y tambe cu loke ta expect di nan tambe, pa maneha un compania debidamente y entrega nan awa na RWZI Parkietenbos y aworaki na RWZI Zeewijk, pa wordo procesa debidamente”, Minister Ursell Arends a duna di conoce.