ORANJESTAD (AAN): Diaranson mainta, durante conferencia di prensa di Gobierno di Aruba, minister di Husticia y Asuntonan Social
sr. Rocco Tjon conhuntamente cu señora Sue-Ann Ras di Departamento di Mucha y Hoben (DMH), a elabora riba e ley di kinderopvang. Esaki, den cuadro di e imagennan cu tabata circula riba plataformanan social, pa loke ta un incidente na un creche specifico. Minister Tjon a sigura cu Gobierno di Aruba y su persona ta condena e actonan aki rotundamente. Pa e motibo aki, Gobierno di Aruba ta inverti hopi pa combati abuso di mucha en general.
Na prome luga, minister Tjon a pone enfasis cu e imagennan aki no ta di algo cu a sosode recien, esaki tabata conoci caba pa algun siman, caminda DMH a actua mesora den colaboracion cu Jeugd- en Zeden Politie. Pa e motibo aki, diferente detencion a tuma luga den e caso specifico aki. E ta hopi importante pa laga e investigacion cana su caminda, y na final di henter e proceso, un huez lo dicidi kico ta e castigo cu lo worde duna.
Banda di esaki, e mandatario a reacciona mesora riba diferente ponencianan cu tabata circula riba plataformanan social, cu Gobierno di Aruba y Ministerio di Husticia y Asuntonan Social no lo a actua debidamente pa combati abuso di mucha. Sinembargo, mester bisa cu despues di luna di april cu a worde decreta luna di concientisacion contra abuso di mucha en general, comunidad completo a haya un bista di kico tur a y ta worde haci e ultimo añanan pa combati abuso di mucha en general.
A base di esaki, por menciona cu ta enfoca hopi riba e parti di maneho, y pa loke ta legislacion ya caba pa algun aña e adaptacionnan a worde haci, caminda a aumenta e castigo pa e diferente tipo di delitonan. Ademas di esaki, no tin un “verjaring” mas, pues semper por keda entrega denuncia, si acaso un mucha a worde abusa, cual ta un paso hopi importante.
Procesonan di trabao a worde adapta y diferente metodonan nobo a worde introduci, manera codigo di proteccion, signs of safety, a inverti den personal cu ta traha den e veld y tambe a inverti hopi a base di proyectonan. Asina por menciona cu a introduci un medico forensico, a introduci diferente metodonan nobo manera multidimensioneel familietherapie. Tur esaki, ta pasonan cu a worde tuma pa eleva siguridad pa nos muchanan.
Banda di esaki, pronto lo habri portanan di e Family Justice Center, pero tambe a introduci e proyecto di Intensief Samenwerken aan Veiligheid. Pues, hopi proyecto a worde introduci pa eleva e siguridad pa nos muchanan. Fin di april, a transmiti un forum nacional cu panelistanan cu ta profesionalnan den e veld social, caminda nan a splica detayadamente kico tur a worde haci e ultimo temponan.
