E por yuda detecta malesanan di trempan cerca baby
ORANJESTAD (AAN): Pa algun tempo caba ta conoci na DIARIO, cu metodonan pa ‘detecta’ cierto malesa a mehora grandemente, y a avanza na un forma hamas antes bisto. Ta ser indica cu esey por ta e motibo cu awendia for di hopi trempan caba, por detecta cu simple test si acaso un persona tin malesa, of cu tin posibilidad di por desaroya cierto problema cu salud.
Ta ser bisa, cu pesey awendia ta detecta mas hende cu Cancer, como cu e forma di detecta a bira mas facil y simpel. Kizas esey lo por ta e motibo cu hopi mucha ta ser detecta cu malesanan cu antes no tabata wordo observa mes na Aruba! Awendia ya ta ‘normal’ cu ta diagnostica muchanan cu diabetes.
Den un entrevista cu Gino Goeloe di Wit Gele Kruis Aruba, a puntre si nan tambe ta detectando mas mucha cu ta hayando malesanan cu normalmente no ta wordo liga cu edad di esnan infantil. El a confirma cu WGK Aruba ta observando tur esaki hopi di cerca, hunto cu Docternan di Mucha riba e isla, y cu Hospital.
Enberdad ta detecta cu tin mas malesa cu antes no tabata wordo observa na Aruba mes. El a admiti cu ainda no por haya motibo pakico esaki ta presenta su mes, como cu esey ta mas complica, pa determina e fuente.
“Nos sa si, y esey ta algo cu Wit Gele Kruis a boga pe for di como 20 aña pasa caba, esta cu ta boga pa bin cu e ‘Hielprik’,” Goeloe a indica. Hielprik ta un proceso na e.o. Hulanda, cu ora un baby nace, nan ta tuma sanger bao di hilchi di e pia, y ta analisa e sanger. E test ta un sorto di screening di baby, pasobra e por descubri eynan mes si acaso e baby tin malesa severo. Si acaso detecta cierto malesa, mesora lo cuminsa cu tratamentonan.
“Pero na Aruba nos no tin’e ainda, y e ta algo cu nos mester bin cune,” Gino Goeloe di WGK Aruba a indica. Pasobra si bo mira aworaki cuanto malesa ta wordo detecta, y cu antes no ta presenta su mes riba e isla, ta un iniciativa pa bin cu e Hielprik aki.
Goeloe a indica cu e sa cu e asunto di Hielprik aki tin atencion di Ministro Dangui Oduber di Salubridad Publico, y e tin su atencion. E ta kere cu si tur cos bay bon, kizas e aña aki ainda lo por concretisa e proceso di Hielprik, hunto cu tur otro stakeholder di salud.
“Mi ta kere cu nos tin di bay den e direccion aki, pasobra e ora for di trempan caba bo por haya sa si e mucha su sistema tin problema genetico, y cu por wordo trata di antemano,” Goeloe a remarca. “Esey ta e parti cu nos kier bay eynan, pues cosnan cu WGK Aruba ta bogando pe den rapportnan, y ainda falta e parti di Hielprik cu ta hopi importante, y ta keda boga pe.”
DIARIO a compronde cu Hielprik ta algo cu bo por haci’e priva, pero e ta costoso como cu e tin di wordo manda te Hulanda.
