Varamento di tonino a wordo causa pa disturbio y actonan peligroso di coredor di jetski y usuarionan di lama

Importancia di turismo marino responsabel

ORANJESTAD (AAN):  Eagle Beach, cu su area designa pa jetski,  ta situa net banda di Malmok y Palm Beach,  cu ta conoci como e area  di refugio mas hopi uza pa tonino, ora nan ta debilita y vulnerabel.       Recien, Aruba Marine Mammal Foundation a asisti na un varamento di tonino na Eagle Beach, cu a wordo causa pa disturbio y actonan peligroso di coredor di jetski y usarionan di lama. 

Importancia di turismo marino responsabel 

            E incidente aki ta un recordatorio fuerte di e desafio nan contemporaneo cu mammal marino ta enfrenta pa cu nan sobrevivencia, incluyendo e impacto di actividad humano riba nan habitat. E aumento drastico di actividad turistico ta trece preocupacion grandi pa e bienestar di e tonino cu ta busca refugio y e conservacion di su sanctuario akinan. AMMF ta enfatiza e importancia di turismo marino  y actividad  recreacional  responsabel pa por proteha e existencia di e refugio vital di tonino na Aruba. 

Acto humano dañino 

            E incidente a cuminsa ora un grupo di tres tonino di especie Stenella attenuata a acerca Eagle Beach buscando refugio,  y a atrae atencion di jetskiernan. Lugar di respeta e presencia di tonino  y mantene un distancia pa garantisa nan seguridad, e jetskiernan a procede cu comportacion cu a pone e bienestar di e tonino den peliger.

            A persigui y rondona e grupo di tonino, entre otro pa saca potret, y den e conmocion aki a separa un tonino recien adulto fo'i su grupo, cu a tuma rumbo pa menos profundidad mas cerca di costa, caminda molester di usario di laman a continua y a conduci cu el a subi tera.

            Afortunadamente, varios turista  y un compania di huur jetski a alerta autoridadnan, y cuater turista bondadoso a brinda ayudo na e tonino te ora cu e team di rescate di mammal marino di Aruba Stranding Network (ASN)  a yega y a asumi encargo di e cuido di e tonino. 

Tonino vulnerabel den refugio

            E Stenella attenuata ta e especie na e di dos lugar di ta  esun mas comun cu ta busca refugio na Aruba, ora nan ta vulnerabel y debilita, manera ora nan ta herida, malo, cansa, of pariendo. Tin biaha tambe pa scapa di persecucion di depredador manera Pseudorca, Orca, of tribon. E lugarnan di mas popular pa nan busca refugio ta e area  di Malmok - Palm Beach y  Mangel Halto - Southside Reef.

Mammal marino  mester subi na superficie pa respira aire cu nan pulmon.

            Ora nan ta debilita nan por tin dificultad pa subi pa respira of no por mes. Na Aruba, varios especie di tonino ta drenta busca refugio durante nan proceso di recuperacion. Tin biaha nan ta drumiendo cu un solo wowo habri na superficie, cu ta tipico pa tonino.

            E delfin debilita sa tuma un posicion semi-vertical cu su rabo na e fondo di laman, minimizando e esfuerso necesario pa subi pa respira. Den algun caso, esun debilita ta landa dal un rondo poco poco bay bin, pa despues reasumi  e posicion aki di descanso.  Den algun caso, un tonino debilita solitario a yega di acerca landado pa ayudo.

            Tur incidente di refugio documenta na Aruba di especie Stenella attenuata ta den pareha of grupo chikito. Den un caso, un tonino acompañante a wordo observa bao awa hopi activo ta drei continuamente  manera un spiraal rond di esun debil, suavemente pushando e curpa cu esun di su mes pa asisti'e pa subi pa respira.

            Den caso di refugio di especie  Steno bredanensis,  un of dos acompañante ta duna sosten pa subi na superficie, cu nan  “pectoral fin” engancha den esun di e debil, respectivamente na un of tur dos banda. Un of mas grupo protectivo por keda cerca den un rij sincroniza, y tin biaha ta crea distraccion pa aleha hende di esun debilita, por ehempel acercando landado, pero tambe a yega di dal y pusha landado como aviso.

            Tambe tin caso di proteccion cu formacion na superficie di un carusel di un grupo di tonino protectivo, cu esun debilita den su centro. Tipicamente e tonino nan ta bolbe laman grandi na bahada di solo.  Periodo di recuperacion por dura pa algun ora, algun dia den e mesun area, of algun siman, cu cambio ocasional di lugar. 

Proteccion di mammal marino 

            Mundialmente mammal marino ta reconoci como un vigilante di salud di e oceano y ta protehi pa tratado nan internacional, por ehempel e protocol “Specially Protected Areas and Wildlife” (SPAW)  di e Cartagena Convention pa Region Caribe,  y leynan nacional,  pa evita nan extincion pa nan balor di biodiversidad y nan importancia den ecosistema.

            Mammal marino tambe ta proteha pa motibo moral y etico, basa riba nan mente compleho, inteligencia, sentimento y autoconciencia, sociedad y cultura, cu alavez a conduci na e proclamacion di Derechonan di Cetaceo di e Grupo di Helsinki na  2010.

            Na Aruba, bao e Decreto Nacional pa Proteccion di Flora y Fauna Endemico (AB 2017.48, Art. 1.b.3) y e Ordenansa di Naturalesa (AB 1995, No. 2, Arts. 4.1, 5, 6, 7) tur especie di tonino y bayena ta clasifica como fauna amenaza y protehi,  prohibiendo di intencionalmente mata of captura nan, causa nan daño of stroba den nan reposo. No ta permiti pa causa molester y maltrato, y pone nan bienestar bao amenaza. 

Kico ta considera di ta molester,  disturbio, y maltrato 

            Molester ta inclui tur acto cu tin e potencial pa causa disturbio di un mamal marino. Disturbio ta inclui tur acto cu ta of tin potencial pa causa stress, alteracion, disrupcion, y cambio den patronchi di nan comportacion, incluyendo respiracion, alimentacion, reposo, refugio, pari, cuido di recien naci, reproduccion, y migracion.

            Actonan humano cu ta causa disturbio ta inclui interaccion cu nan, duna alimentacion, landamento cu nan,  separa un pareha di mama y yiu for di otro, provoca un reaccion di e mammal marino  (por ehempel fluit, canta, of bati riba un objeto), blokea nan den nan rumbo di biahe of entre un lancha y costa,  of entre un lancha y otro lancha. E sonido di motor  y presencia di lancha, drone y avion tambe ta causa disturbio. Disturbio por causa daño na tonino.

            Maltrato ta inclui tur acto cu tin potencial di causa daño, lesion, of morto. 

Duna espacio y busca ayudo 

            Mammal marino mester di espacio amplio y sin disturbio pa descansa y recupera. Accionnan di usario di laman tin un impacto directo riba bienestar di mammal marino.  AMMF ta urgi publico pa na tur momento ora di encontra mammal marino den laman, pa tur lancha (incluso di jet ski, windsurf, kitesurf, hydrofoil, kayak) y landador (incluso buceador ) respeta nan necesidad di espacio amplio sin disturbio.      Ora di encontra tonino den refugio of pega riba beach, alerta ASN pa ayudo, na 5924333 (AMMF) of 100 (polis). ASN lo duna guia con pa  asisti na e tonino mientras cu e respondernan di rescate di mammal marino ta na caminda. 

Con pa preveni molester, disturbio, y maltrato 

            Pa proteha e bienestar di tonino, laga nan na paz, evita disturbio y mantene un distancia amplio, na tur momento. Duna instruccion di e conducta corecto na tur otronan cu ta cu bo.  No haci cambio di velocidad of birada di golpi cu e boto. 

            No purba acerca, persigui, rondona, mishi, gara, tene, alimenta,  cruza meymey di un grupo of  blokea nan caminda pa laman grandi. Mantene e ambiente keto. No haci desordo y boroto, manera batimento riba objeto, grita, fluit, canta, of musica duro.  No provoca un cambio den nan comportacion, por ehempel purbando pa haya nan bin mas cerca di bo.  No comparti post den medio social pa difundi nan presencia.  Esaki por atrae un multitud di hende, causa disturbio grandi y pone nan bienestar bao amenaza. Incidente nan asina a ocuri y ripiti  den pasado na Aruba y a causa situacion nan incontrolabel cu a pone e seguridad di tonino y  ser humano na peliger. 

Codigo de conducta y educacion

            AMMF su prioridad ta pa sigura bienestar di mammal marino,  incluyendo e tonino den su refugio of den caso di varamento,  pa medio di educacion di usuario di laman pa aumenta nan concientisacion y comprendimento di e conducta corecto segun e codigo di seguridad den caso di encuentro cu mammal marino. Un programa di educacion  di e codigo di conducta a wordo prepara na 2023 y lo wordo ofreci den futuro cercano. 

Gradicimento 

            Conservacion di Aruba su mammal marino y su refugio ta depende riba colaboracion di henter comunidad maritimo y costero. AMMF ta gradici tur persona cu semper a y ta duna nan aporte y respect na proteccion di mammal marino, pa nan colaboracion y sosten, y tur persona cu a contribui na e rescate di e varamento di tonino na Eagle Beach.