Salario minimo ta aumenta 1 Januari 2024 na 1.986,20

Ministro Glenbert Croes a anuncia

ORANJESTAD (AAN): Riba Diabierna 15 di december Minister Glenbert Croes a firma reglamento ministerial pa cu aumento di salario minimo entrante 1 di Januari 2024.

   Un aumento significante di 4.9% cu ta yega te na e suma di 1.986,20 Florin mensual, conforme conseho di DAO y SER.

   Na januari 2023 e mandatario a aumenta esaki na 1.893,40 Florin y pa 1 Januari 2024 e salario minimo ta aumenta cu 92,80 pa luna yega te 1986,20.

   Desde cu Minister Glenbert Croes ta e titular di Labor, cual cartera el a asumi 17 di november 2017, el a haya e salario minimo na 1711,15. Na 2019 Minister Glenbert Croes a aumenta esaki na 1762,48.

   Manera nos tur sa, na 2020 pandemia di Covid-19 a bati na porta y gran parti di  poblacion a perde trabao y comercio di Aruba a worde afecta gravemente. Pues pa 2021, 2022 no tabatin espacio pa por introduci un aumento salarial. Pero ya entrante 1 di januari 2023 e mandatario a aumenta e salario minimo. Y awo pa 1 januari ta pa di 4 bes cu den su 6 aña como Minister cu e ta logra introduci un aumento cu apoyo unanime di Gabinete Wever Croes 2.

   Aruba ta den un acenso economico danki na nos Turismo. Y e motor di nos turismo ta tur nos hendenan trahando den horeca cu merece e reconocimento di un aumento di e salario minimo como danki tambe pa nan empeño y servicio laboral. 

   Nos pueblo a pasa dos aña hopi dificil durante pandemia. Aruba a biba dos aña hopi dicifil durante e pandemia. Pero hunto den union y positivismo nos ta gradualmente pero cu pasonan sigur elevando e calidad di bida di tur nos conciudadanonan.