Usuarionan di Arubus mester tene cuenta cu cambio di ruta e weekend aki pa motibo di e 'KLM Marathon'

ORANJESTAD (AAN) – Sannin Daou, Relacionista Publico di Arubus NV, a splica cu en conexion cu e KLM Marathon, mester bin cu cambio den e rutanan di Arubus.

            Daou a splica cu e KLM Marathon ta bay sosode den dos parti: un parti lo ta awetardi unda e 5 kilometer lo tuma lugar, y e di dos ta Diadomingo cu ta bay tin e marathon y e half marathon.

            Diasabra lo no cera caminda. Pues, tur dos banda di caminda ta keda habri pero mirando cu asina mes, esaki lo trece hopi stagnacion den trafico, Arubus a dicidi cu, pa hacie mas facil, su busnan lo desvia na momento di yega Amsterdam Manor.

            E busnan lo tuma e rotonde eybanda bay direccion Sasaki, y drenta bek na haltura di South Beach net despues di Hilton y lo sigui bay direccion Noord.

            E busnan cu ta bin for di Noord lo haci e mesun recorido: na haltura di South Beach lo tuma man robes, lo subi Sasaki y na e rotunda di Super Food lo bay man drechi y sali atrobe na e ruta normal cu ta L.G Smith Boulevard.

            Tocante Diadomingo, Sannin Daou tin entendi cu lo cera e camindanan entrante 2 of di madruga, pero cu e banda pariba lo keda habri y e banda pabao lo keda cera. Esaki ta nifica cu direccion Noord pa Oranjestad lo ta cera, y direccion Oranjestad pa Noord pa high-rise lo ta habri.

            Esaki ta trece cune cu e unidadnan di Arubus lo keda core, pero solamente tur hende mester tene cuenta cu Arubus ta coriendo un banda di caminda so. Arubus lo core e ruta completo pasando low rise, high rise te cu Palm Beach Plaza, na unda nan lo subi Sasaki bin bek, mirando cu lo ta cera di Palm Beach Plaza bay Noord, anto na haltura di e cruzada di Wendy’s lo bay ‘lens af’ drenta den Keito, pa bin sali bek na e rotunda di Super Food, unda lo tuma bek via Amsterdam Manor, e ruta normal di L.G Smith Boulevard.

            Loke ta importante pa e usuarionan di Arubus sa, ta cu sea nan bay traha na hotel of nan ta bin Oranjestad, e unico ruta cu nan tin cu tuma, ta e bus cu ta bayendo Noord, pasobra no ta bay tin un bus biniendo Zuid, pasobra e area aki ta cera. Kiermen sea e usuario ta bayendo trabao of ta saliendo for di trabao, den ambos caso solamente tin e bus bayendo Noord, anto via e ruta alternativo aki por bin Oranjestad.

            Daou a agrega cu mester tene cuenta cu ta bay tin bastante trafico y Arubus su busnan por ta un tiki mas laat cu normal, pero nan lo core y lo haci nan best pa ta mas tanto posible na tempo, pero nan sa cu lo bay tin un tiki tardanza of retraso pa motibo di e evento menciona.