ORANJESTAD (AAN): Director di Stichting Katholiek Onderwijs Aruba (SKOA), Anuesca Baly a duna di conoce
cu diabierna tabata un dia historico pa SKOA den cuadro di e convenio cu Leerorkest pa cuminsa duna mes di 'Algemene Muzikale Vorming' den luna di September.
Baly a agrega cu SKOA a wordo acerca door di Leerorkest na 2018 pa wak con por a haci e proyecto aki posibel den e scolnan basico. Tabata tin varios reunion cu e tuma lugar entre SKOA y Leerorkest caminda cu a delinea con kier a haci esaki cu e scolnan den futuro.
El a remarca cu muziek ta hopi importante y ta mir'e como un parti di e formacion di un alumno. No solamente e ta desaroya partinan di su cerebro cu ta importante pa e siña. Pero tambe e parti emocional.
Hopi biaha door di musica ta siña con pa expresa emocionnan cantando of pa medio di un instrumento musical, a agrega.
Segun Anuesca Baly ora cu Leerorkest a acerca nan no a duda ningun momento pa bay den e 'joint venture' cu e scolnan piloto.
Tabata tin dos scol piloto, pero tambe otro scolnan cu a participa y cu tabata ansioso pa cuminsa. Asina a bin cu ideanan pa locual ta e aña aki y na September tin scolnan cu lo bay cuminsa cu e 'leerorkest traject' cu ta digital.
E intencion ta pa esaki bay te na kleuter. A pone pa e aña escolar 2022-2023 pa e ultimo klas di kleuterschool tambe inicia cu e programa aki, a bisa.
SKOA y Leerorkest ta kere cu ta importante pa trece e parti di formacion pa cada mucha cu ta na scol. Hopi biaha un mayor no por 'afford' pa laga su yiu bay les di musica. Pesey ta importante pa dun'e e formacion y poco poco introduci e mucha den e formacion aki.
Na final di dia lo por tin un orkesta completo na un scol unda te hasta kisas lo por organisa competencia cu diferente orkesta na Aruba, e directora di SKOA a indica.
