Universiteit Leiden ta desaroya un Centro di Conocemento pa Relacionnan den Reino

Na Den Haag

ORANJESTAD (AAN): Cuminsando na september 2026, Universidad di Leiden situa na Den Haag lo establece un Centro di Conocemento nobo pa Relacionnan di Reino. Lo trece investigadornan cientifico hunto, desaroya educacion riba relacionnan di Reino y lo tin alavez como meta pa contribui na debate publico, crea y aumenta un comprension mutuo y un miho cooperacion dentro di Reino.

   Cu sosten di Campus Den Haag, e prome pasonan pa realisacion di e Centro di Conocemento por wordo tuma entrante augustus proximo. E team ta consisti di Wouter Veenendaal (lider di proyecto), Tanja Fraai (consehero di comunicacion y netwerk), y alavez riba termino corto e team ta wordo extende door di recruta un persona pa asisti riba asuntonan di educacion y investigacion cientifico.

   Un Centro pa y tur parti di Reino: E Centro di Conocemento ta enfatisa cu e ta pa y di tur parti di Reino, e mester provee espacio pa tanto investigadornan di e parti Caribense di Reino como esnan di e parti Europeo di Reino den varios disciplina.

   Conocemento cu actualmente ta fragmenta entre institutonan y cientificonan den e diferente paisnan y islanan di Reino por wordo inventarisa, consolida y haci accesibel. E Centro di Conocemento tambe tin como meta pa ofrece oportunidadnan na cientificonan cu actualmente tin espacio limita pa haci investigacion.

   Cuestionnan encuanto gobernacion: E enfoke di e Centro ta riba asuntonan di gobernacion y politica. Cual ta e structura di gobernacion di nos Reino? Cual gobernacion ta responsabel pa exactamente kico? Y con e tareanan di gobernacion y administracion ta wordo ehecuta den temanan manera desaroyo social-economico, siguridad (internacional), cambio di clima, y asuntunan di migracion?

   Necesidad na conocemento y cursonan educativo: E Centro di Conocemento ta cumpli cu un necesidad creciente pa mas conocemento y cursonan educativo pa loke ta trata Reino. Lider di e proyecto Wouter Veenendaal, titular di e Catedra den Relacionnan di Reino: “For di inicio di e Catedra dos aña pasa, mi a ripara cu tin un necesidad enorme pa conocemento tocante Reino na ambos banda di e oceano. Esaki ta bisto for di e popularidad di e curso postgrado riba Asuntonan di Reino, pero tambe for di e peticionnan di hopi instancianan cu ta envolvi riba Relacionnan di Reino.

   E demanda halto pa conocemento y experticio pa loke ta trata Reino ta ilustra cu tin un necesidad grandi pa un Centro di Conocemento.”

   Colaboracion: Universidad di Ciencia Aplica di Den Haag, cu ta co-ofrece e curso postgrado di Relacionnan den Reino, ta un partner importante. E colaboracion entre Universidad y e Universidad di Ciencia Aplica ta haci posibel pa conecta e bista cientifico cu practica directamente. Ademas e intercambio entre e practica y ciencia tambe lo bira un principio di guia importante pa e Centro di Conocemento.

   Tambe lo busca y amplia colaboracion cu institutonan di conocemento Caribense y investigadornan cientifico independiente, pa asina nan tambe por bira co-propietario di e Centro di Conocemento. Sue-Ann Lee, Rector di Universidad di Aruba: “E Centro di Conocemento ta un paso importante pa sigui fortalece otro, conecta, colabora y conhuntamente desaroya conocemento. Pa investigadornan y institutonan educativo dentro di Reino, incluyendo Universidad di Aruba, esaki ta ofrece oportunidadnan pa trece conocemento contextualisa, investigacion, y educacion mas cerca di otro y ta aporta na fortalece desaroyo di nos pais y conhuntamente traha na Relacionnan mas fuerte den Reino.”

   Universidad di Leiden, y mas specificamente e Campus Den Haag, lo acapara e centro di conocemento. Tur instituto cu ta atende cu Relacionnan di Reino ta situa na Den Haag, pues ta logico pa establece e Centro di Conocemento den e ‘Cuidad di Reino’ aki.

   Ampliando e red: E prome paso den establece e Centro di Conocemento ta pa expande e netwerk na tur dos banda di e oceano. Tanja Fraai lo fungi como consehero di comunicacion y netwerk di e Centro di Conocemento. E ta entusiasma pa forma mas conexion: “Conocemento ta valioso y ta evolucionando constantemente, pues esaki ta un tremendo oportunidad pa por yuda construi un luga caminda e conocemento ey ta bin hunto y ta disponibel pa tur hende.”

   Como e di tres miembro di e team, un assistent riba asuntonan di educacion y investigacion cientifico lo wordo nombra pa asisti den e ehecutacion di e pasonan logistico y organizatorio pa establecimento di e Centro di Conocemento. Ta e intencion pa publica e vacatura pa e funcion menciona den e proximo simannan.

   E establecimento di e Centro di Conocemento pa Relacionnan den Reino ta posibel door di sosten di Campus Den Haag, y ta wordo sostene door di e Facultad di Ciencia Social di e Universidad. E Centro di Conocemento lo habri su portanan na september 2027.