Ora ta cera caminda door di marathon
ORANJESTAD (AAN) Un biaha mas e taxista Ronny Gomes, den entrevista cu DIARIO, ta reclama fuertemente, riba e problema cu ta surgi na Palm Beach, ora cu tin eventonan, por ehemplo cualkier careda di Marathon.
El a demanda cu e actividadnan di e indole aki tin cu stop. El a bisa cu e ta compronde cu hopi kier biba di e actividadnan. El a bisa cu antes tempo di e Highway tabata na Eagle Beach no tabata tin problema, pero tin mas negoshi a bin acera, y na caminda di Palm Beach tin tres restaurant cu ta wordo blokea door di ciere di caretera, y nan ta yama grita e taxistanan y bisa nan cu e turistanan ta reclama cu no ta bin Aruba mas, pero e ta puntra con e taxistanan por yega si e rutanan ta wordo blokea y nan ta keda pega door di e eventonan.
El a acentua cu mitar di Aruba ta bin wak e eventonan, mescos cu ora tin carnaval.
“Pesey mi ta bolbe bisa, bo no por duna mas permiso pa actividadnan aki nan. Bo ta causando problema. Ta bin Marathon atrobe dilanti akinan. Bo a lubida cu tin otro negoshinan? Un turista akinan tabata puntra unda e por bay pa yega Palm Beach. Tin caminda aki banda pa bay Palm Beach of Eagle Beach?”, el a reitera.
Gomes a vocifera cu Aruba a crece den turismo, tur e negoshinan cu a habri den e areanan di hotel, pero no tin parkeo ni pa e trahadornan.
E ta haya cu mester cambia e infrastructura di caminda den e areanan aki. E ta bolbe puntra con ta bay haci cu e trafico hopi druk, unda e tabata papiando cu e reportero. Tin restaurant cu a habri entrada pero e hendenan ta cuminza cana riba un plas y despues ta keda cana riba caya. Den area unda Paseo Herencia ta, no tin caminda pa subi ni baha hende di acera.
Dilanti un hotel high rise, trafico a pega formal, pasobra tabatin tres pa cuater tourbus cu no tabata sa na unda pa baha turistanan.
El a remarca cu Aruba ta keda ricibi cantidad di turista mientras cu no tin parkeo suficiente pa nan bin. Ora tabatin caminata di Aruba, nan a cera caminda, y tres trahado di restaurant mester a cana bin na tres trapi, pa bin busca cliente, pasobra nan a cera e caminda.
Segun Gomes instancianan concerni mes ta cera caminda sin tene cuenta cu taxi of con hende ta yega, y ta lubida cu tin restaurant ey banda. El a vocifera cu si no ta DOW ta Polis ta duna vergunning pa actividadnan y tur ta responsabel pa Aruba. Nan no ta midi e consecuencianan ora nan duna vergunning of cera caminda. Esaki a parti di e critica fuerte cu taxista Ronny Gomes tin riba ceramento di caminda y actividadnan publico cu ta stroba taxistanan haci nan trabao.
