Gabinete AVP-Futuro a enfatisa n’e politiconan di Den Haag
ORANJESTAD (AAN): Prome Minister mr. Mike Eman, hunto cu vice-prome minister mr. Gerlien Croes y Minister Plenipotenciario mr. Mildred Schwengle, a reuni diamars atardi cu miembronan di e Comision Fiho pa Relacionnan di Reino di Eerste Kamer der Staten-Generaal na Den Haag, Hulanda. Durante e reunion, delegacion di Aruba a comparti e vision y prioridadnan di Gabinete AVP-Futuro tocante desaroyo economico, bienestar social y fortalecemento di cooperacion den Reino Hulandes.
Prome Minister Mike Eman a bisa cu Gobierno ta “sumamente contento” cu e oportunidad pa tene un dialogo habri cu e comision, unda Aruba por a duna un bista amplio di e direccion cu pais ta tumando. “Nos ta hopi contento cu e desaroyo cu Aruba a logra. Nos economia ta creciendo, nos industria turistico ta fuerte y Aruba tin e entradanan per capita cu ta destaca den region. Nos tin un fondo financiero fuerte y un presupuesto balansa,” Prome Minister Eman a declara.
Sin embargo, Prome Minister a enfatisa cu Gobierno ta wak cu preocupacion con e progreso economico no semper tur ciudadano riba nos isla ta logra sinti esaki.
“Hopi biaha e cifranan macroeconomico ta alentador, pero nan no ta traduci den un miho calidad di bida pa nos ciudadano manera nos kier mira,” Eman a bisa.
Durante e reunion, e tema di pobreza y e asina yama “armoedegrens” tabata un di e puntonan central den e conversacion. Prome Minister a splica cu Aruba no tin un cifra oficial di “armoedegrens”, pero si tin un cifra di “bestaansminimum”, y cu un porcentahe considerabel di comunidad ta biba bou di e nivel ey.
“Nos no tin un cifra oficial di e “armoedegrens”, pero nos tin un di e “bestaansminimum” y un porcentahe hopi halto di nos comunidad ta biba bou di e nivel ey. Esey ta un tarea importante pa nos Gobierno,” Prome Minister a enfatisa.
Gabinete AVP-Futuro, segun Eman, a cuminsa cu maneho concreto pa yuda esnan cu ta den un posicion vulnerabel. Entre e alivionan menciona tabata aumento di pensioen pa nos grandinan, mehoracion di entrada y e inicio di un dialogo social nacional pa evalua posicion di aumento di e salario minimo. “Nos ta bay den un dialogo social cu meta pa wak con nos por conecta salario minimo na e “bestaansminimum”. Actualmente tin hopi hende cu ta biba cu dificultad pa nan cen yega te fin di luna,” Eman a bisa.
Prome Minister tambe a pone enfasis riba e balor di Reino Hulandes pa Aruba, specialmente den momentonan di tension geopolitico den region. “Si nos mira e situacion reciente cu Venezuela, nos ta realisa con importante e proteccion y stabilidad cu Reino ta ofrece. Danki na Reino, Aruba por enfrenta situaciondelicado cu siguridad y stabilidad,” Prome Minister a indica. Eman a agrega cu Aruba mester sigui inverti den e relacionnan den Reino y crea mas entendimento mutuo entre Aruba y Hulanda.
“Tin biaha nos mester comunica miho na Hulanda e balor strategico cu Aruba tin pa Reino tambe. E acuerdonan cu institutonan manera Wageningen University & Research (WUR) ta crea e oportunidadnan pa ambos banda y ta fortalece posicion di Reino den region,” Eman a declara.
Delegacion di Aruba a sali satisfecho cu e reunion y cu e optimismo mira den miembronan di Eerste Kamer pa sigui fortalece cooperacion y dialogo entre Aruba y Hulanda bou gobernacion di Gabinete AVP-Futuro.
