Universidad di Aruba a anuncia firmamento di MoU cu ‘Energy y Science Foundation’

MoU ta boga pa investigacion y innovacion

ORANJESTAD (AAN):  Recientemente Universidad di Aruba (UA) anuncia firmamento di un ‘Memorandum of Understanding’ (MoU) cu SEDI ‘Energy y Science Foundation’ (ESF). E colaboracion aki ta basa riba un compromiso comparti pa haci uzo di e potencial di investigacion, educacion, y ciencia pa mehoracion di e region Caribense.

            E obhetivonan primordial di e MoU aki ta inclui boga pa investigacion y innovacion den solucionnan sostenibel, fomenta avancenan tecnologico pa medio di iniciativanan di investigacion conhunto, empodera e futuro generacion di lider pa medio di intercambio di studiante y modulonan educacional cooperativo, y amplia rednan colaborativo cu otro institucion- y expertonan.

            E asociacion entre UA y ESF lo permiti crecemento den e impacto cu cada organizacion por logra door di comparti cu otro nan recursonan y infrastructura.

            E MoU lo permiti entre otro, colaboracion mas estrecho cu e programa di SISSTEM di UA y ‘Ed Cheung Science y Innovation Center’. Conhuntamente nan ta enfoca riba sostene educacion di STEM y investigacion di e retonan di desaroyo sostenibel di nos isla.