Alumnonan di Maria College a haya sa mas di e proyecto di Levi Silvanie

Riba salud mental

ORANJESTAD (AAN): Recientemente, e alumnonan di CB-2 y alumnonan di CA-1 cu tin e materia di CKG na Maria College MAVO, a participa na e evenemento “School Tour 2023”.

   Manera ta conoci, esey ta un proyecto musical pa crea conscientisacion di salud mental, enfoca riba hobennan di scol secundario.

   Sigur tabata great di por a presencia e conocido musico Levi Silvanie uza su musica y storia pa guia e hobennan cu ta pasando den diferente problema cu nan salud mental. Su meta ta pa logra tene combersacionnan habri tocante salud mental a traves di musica.

   Via di The School Tour y The Album Experience, Silvanie kier usa e poder di musica pa pone mas focus riba salud mental y cuido personal. Un experiencia inmersivo den cual e ta comparti su musica y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel. 

   Danki na e apoyo di Ministerio di Educashon y Deporte di Aruba, Ministerio di Husticia y Asuntonan Social, Departamento di Enseñansa, Gianni’s Group, Elite Productions, y otro partidonan, e prome etapa di e proyecto aki por worde realisa y sostene cu plannan grandi pa futuro.